Progresu konstrusaun UKL, iha aldeia Bilicou, suku Holsa, postu administrativu Maliana, munisípiu Bobonaro, kinta (19/08). Imajen Tatoli/Sérgio da Cruz.

BOBONARO, 19 agostu 2021 (TATOLI)— Progresu  konstrusaun Uma Kb’it Laek (UKL), iha aldeia Bilicou, Suku Holsa postu administrativu Maliana, munisipiu Bobonaro atinje ona 25% tuir estudu ne’ebe tékniku Programa Nasionál Dezenvolvimentu Suku (PNDS) rejista.

Fazeadamente prosesu uma tolu iha suku Holsa to’o ona hada bataku, posiblidade semana ida-ne’e finaliza no kontinua fali ba faze tuir-mai, tanba distribuisaun materiál hosi kompañia fornesedór la atrazu.

Notísia relevante:UKL iha Bobonaro foin implementa iha suku neen

Benifisiária, Paulina Habu Mau, agrade ba Governu liuliu ba implementadór programa UKL liuhosi PNDS, tanba bele tulun hodi hakmán sira-nia sofrementu ne’ebe sira enfrenta durante tinan naruk helik de’it iha uma ne’ebé la dignu.

“Ida-ne’e hanesan mehi ne’ebé ami la espera, maibé ho ita na’in ulun sira nia matenek, ami bele sente duni uma dignu, maske ami kb’it la to’o atu halo,” Paulina Habu Mau hateten iha Bairru Hospital tuan Maliana, kinta ne’e.

Bainhira konstrusaun ne’e konklui ona, nia promete sei kuidadu ho di’ak to’o tempu naruk, tanba uma ne’e hanesan rekordasaun ida hosi Governu no sai hanesan istória ida ne’ebé sei konta hosi jerasaun ba jerasaun.

Xefe Suku Holsa, António Santa Cruz, reprezenta povu louva inisiativa Governu, tanba programa ne’e benefísia direta ba komunidade vulnerábel liu no kb’it la’ek sira.

Tuir nia, implementasaun programa ne’e transparante tebes, tanba durante halo verifikasaun dadus involve hotu órgaun independente-sira no mós autoridade lokál.

Nia mós konsidera programa ne’e kontrubui ba rekoperasaun ekonomia komunidade sira nian, tanba durante periúdu COVID-19, komunidade barak mak laiha rendimentu hodi sustenta nesesidade lor-loron.

Durante ne’e autoridade lokál sempre iha liña koordenasaun di’ak ho tékniku PNDS, atu halo fiskalizasaun no kontrolu ba prosesu konstrusaun, nune’e finaliza tuir kontratu ho durasaun fulan tolu.

Konstrusaun ne’e hahú iha 31 jullu, maibé atrazu oitoan hodi  kontinua fali iha 09 agostu, no uma tolu ne’e, iha rua ho medida 6×7 totál orsamemtu $17.227 kada uma, no ida seluk ho valór rihun $14-resin ho medida 6×6 no durasaun kontratu fulan tolu.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here