Seremónia pose kargu xefia MPM, iha Otél Timor, kinta (19/08). Imajen TATOLI/Florêncio Miranda Ximenes

DILI, 19 agostu 2021 (TATOLI)-Ministru Petróleu no Minerál, Víctor da Conceição Soares, akompaña ho Komisáriu Komisaun Funsaun Públika (KFP) Asuntu Disiplinár, António Freitas, fó pose ba kargu xefia ministériu hamutuk 13 ba mandatu tinan-haat.

“Pose ne’e hanesan momentu importante ba Ministériu Petroleu no Minerál atu servisu hamutuk ho Komisaun Funsaun Públika hodi hahú hadi’a no konsolida instituisaun ne’e nu’udar orgaun vitál ba Estadu Timor-Leste nia sobrevivénsia. Tanba ita hotu hatene MPM mak kaer polítika no jestaun ba rekursu petróleu no minerál,” Ministru Víctor hateten iha ninia diskursu seremónia pose, iha Otél Timor, kinta ne’e.

Rekrutamentu ba vaga ne’e, liuhosi prosesu méritu ne’ebé tuir prosedimentu no regra legál KFP, ne’ebé aplikante ne’ebé konkorre vaga ne’e hamutuk 128, maibé selesiona na’in-13, kompostu hosi haat asume knaar hanesan Diretór Nasionál, ida hanesan Xefe Gabinete ba Apoiu Jurídiku no ualu hanesan Xefe Departamentu iha MPM.

Tuir Ministru, MPM objetivu mak atu kontinua dezenvolve no jere rekursu petroleu no minerál hodi garante dezenvolvimentu ekonómiku sustentável nasaun.

Atu atinje meta hirak ne’e, MPM halo ona mudansa estrutura hanesan meiu ida atu konsolida di’ak liután servisu instituisaun hodi asegura dezenvolvimentu sustentável ba rekursu petróleu no minerál.

“Ita hahú daudaun halo mudansa ba estrutura ministériu, hanesan jestu ida hodi hadi’a liután jestaun administrasaun no hasa’e kualidade servisu ministériu hodi bele atinje vizaun, misaun no objetivu ne’ebé definidu tuir lei orgánika MPM,” nia akresenta.

Nune’e, Governante ne’e fó parabéns ba kargu xefia sira no husu atu kontinua servisu ho profisionál tuir lei no presedimentu no hamutuk serví nasaun no povu.

“Ita bele garante katak hahú ohin ba oin, sei iha kualidade jestaun institusionál no prestasaun servisu di’ak no kualidade ba nasaun no povu Timor-Leste tomak,” nia hatutan.

Ministru ejize emposadu sira komprova dezempeñu tuir méritu ne’ebé hetan atubele kontabiliza iha prestasaun servisu.

Iha biban hanesan, Komisáriu KFP ba Asuntu Disiplinár, António Freitas, husu ba emposadu atu servisu ho disiplina no asegura dokumentu ministériu nian.

“Ha’u husu imi labele komete irregularidade durante mandatu tinan-haat, tanba la’ós liuhosi selesaun méritu mak labele hasai ona, maibé imi kuandu komete irregularidade bele kona sansaun disiplinár no bele demite hosi kargu,” nia fó hanoin.

Biban ne’e, Komisáriu ne’e apresia tanba ba dahuluk MPM iha kargu xefia ne’ebé liuhosi teste méritu hodi sai funsionáriu iha ministériu ne’e.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here