Membru F-FDTL partisipa iha misa agradesimentu hodi komemora loron aniversáriu FALINTIL ba dala-46. Iha Igreja Motael, Dili, kinta (19/08). Imajen Tatoli/Francisco Sony

DILI, 19 agostu 2021 (TATOLI)-FALINTIL-Forsa Defeza Timor-Leste (F-FDTL), sesta ne’e, selebra misa agradesimentu ba aniversáriu loron Forsa Armada Libertasaun Nasional Timor Leste (FALINTIL) nian ba da-46 (20 agostu 1975-2021).

Iha selebrasaun misa ne’e, amu selebrante Mario de Sousa Vicente, SDB, haktuir Evanjellu Saun João nian ba F-FDTL sira atu sai bibi-atan ne’ebé di’ak, katak bibi-atan ne’ebé di’ak  sei mate ba nia bibi-sira.

“Leitura ne’ebé hotu-hotu rona rai ne’ebé Maromak promete ba Moises atu hetan, rai refere la fasil atu hetan, maibé tenke liuhosi prosesu naruk hanesan luta naruk mak foin hetan, maibé bainhira luta to’o rohan Moises rasik labele goja rai ne’ebé Maromak rasik promete ona ba nia, tanba nia mate,” Amu Mario de Sousa Vicente hateten.

“Ne’e hatudu mai katak molok ita atu hetan independénsia ka liberdade ne’ebé ita hetan agora daudaun ne’e la mai gratuita, maibé liuhosi luta naruk ne’ebé ita-nia martires sira-nia luta barak mak lakon vida la konsege haree ita-nia independénsia nune’e ita ne’ebé sei moris tenke lori rai ne’e ho domin, hanesan bibi atan ne’ebé di’ak sei ukun nia bibi sira ho domin,” Mario de Sousa Vicente hateten liuhosi nia omilia iha Igreja Santo António, Motael, Dili.

Nia dehan, martires ne’ebé mate ona jerasaun foun sira tau laran katak sira-nia mate valór boot ba hotu-hotu, nune’e loron FALINTIL nian ne’ebé sei monu ba loron sesta (20/08), husu nafatin martires nia tulun nune’e bele fó forsa kbiit ba ukun na’in no jerasaun foun FALINTIL nian bele lori rai ida-ne’e ba oin ho domin no dame.

Iha misa agradesimentu ne’e hetan partisipasaun hosi membru Governu balu hanesan, Sekretariadu Estadu Arte no Kultura (SEAK),  Membru F-FDTL, veteranu balu inklui sarani sira.

Hafoin ramata misa agradesimentu ne’e, membru F-FDTL sei lori ai-funan ba kari iha semitériu eroi Metinaro, Dili.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here