Mini worksop kona-ba sustentabilidade área projetija iha Timor-Leste, ne’ebé realiza iha salaun MAP, Comoro, kinta (19/08). Imajen TATOLI/Natalino Costa

DILI, 19 agostu 2021 (TATOLI)—Ministériu Agrikultura no Peska (MAP) hamutuk ho parseiru sira realiza mini workshop hodi diskute kona-ba sustentabilidade área protejida iha Timor-Leste.

“Ohin loron, MAP hamutuk ho Sekretaria Estadu Ambiente (SEA) no Konservasaun Internasionál realiza mini workshop hodi halibur ideia hamutuk ho parseiru sira kona-ba futuru finansiamentu área protejida iha Timor-Leste,” Diretór Konservasaun Internasionál, Manuel Mendes, informa ba Agência TATOLI, iha salaun MAP, Comoro, kinta ne’e.

Diskusaun ne’e foka ba área protejida Legumau no Kutulau iha parte Liquiçá nian.

“Ita sei serbisu hamutuk hodi elabora idea, hafoin halo estratejia ba finansiamentu sustentável ba área protejida iha Timor-Leste,” nia akresenta.

Antes ne’e, projeitu ne’e hetan fundu hosi Global Environment Facility hamutuk millaun $3 no daudaun implementasaun projetu tama ona ba tinan-tolu.

“Ita haree liuhosi projeitu ne’e ita ajuda ona Governu liuhosi ministériu relavante estabelese demarkasaun iha área protejida rua, hafoin ita halo mapa rekursu ho komunidade sira no prodúz viveiru hodi kuda ai-oan iha área sira ne’ebé maka sai hanesan alvu ba projetu ne’e,” nia dehan.

Iha fatin hanesan, Diretór Jeral Meiu Ambiente, Joao Carlos Soares, konsidera Timor-Leste vulnerável ba alterasaun klimátika, tanba ne’e presiza konvida sosiedade sivil, liña ministeriál, setór privadu no publiku atubele fó hanoin no sujestaun atu halo jestaun sustentabilidade ba rekursu naturál inklui finansientu ba área protejida.

“Ministériu Agrikultura Peska deklara iha área protejida 43 no parke nasionál rua, maibé to’o agora ita seidauk halo jestaun ba ida-ne’e, entaun liuhosi programa ne’e, ne’ebé iha ona akordu desde tinan 2016, atu halo konservasaun ba área protejida sira,” nia tenik.

Jornalista : Natalino Costa

Editora    : Julia Chatarina

HAKEREK NO HATÁN

Please enter your comment!
Please enter your name here