Komunidade Salesiano Don Bosco Comoro, kinta ne’e fó apoiu nessesidade báziku ba ema ho defisiénsia matan sira iha AHDMTL. Imajen/Espesiál.

DILI19 agostu 2021 (TATOLI)—Komunidade Salesiano Don Bosco Comoro, kinta ne’e fó apoiu nessesidade bázika ba ema ho defisiénsia matan sira iha Asosiasaun Halibur Defisiénsia MatanTimor-Leste (AHDMTL).

Padre Guy do Carmo da Silva, SDB, hateten apoiu ida-ne’e hanesan aktu solidaridade ida hosi komunidade Salesiano Don Bosco Comoro ne’ebé inisia hosi Don Bosco Misaun iha Amérika, tanba COVID-19 no inundasaun ne’ebé akontese iha 04 abril iha Timor-Leste entaun sira iha inisiativa haruka fundu atu bele apoiu sosiedade ein jerál liu-liu ba hirak ne’ebé vulneravél liu.

“Ami apoiu ona ba AHDMTL. Foin daudaun ami apoiu ba refujiadu sira iha Beduku, Manleuana, iha Don Bosco, no ami mós fó apoiu ba komunidade sira hela iha Beduku nia leten ne’ebá no komunidade sira-ne’ebé iha área rurál, Ahisaun inklui madre Alma sira hodi fó ba ita-nia alin defisiénte sira. Ami mós lori ba fó ita-nia maun alin sira-ne’ebé halibur foer iha Tibar no fó mós Prizaun Gleno, sentru formasaun Don Bosco Comoro. Semana ne’e, ami sei lori nesesidade bázika ne’e ba Maliana,” Padre Guy do Carmo da Silva hateten ba Agência Tatoli, via teléfonika.

Iha fulan rua ne’e, Komunidade Salesiano Don Bosco Comoro foku liu hodi fó apoiu nesesidade bázika ba ema vulneravél sira iha Dili, Liquiça, Maliana no Ermera.

“Ami-nia programa ne’e ba fulan neen. Depois fulan rua tuir mai, ami sei ba fali área Baucau no Lospalos iha fulan ikus, novembru no dezembru,” nia hateten.

Diretór Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso, hato’o agradesimentu ba amu Salesiano Don Bosco Comoro, tanba bele tau mós AHDMTL iha lista hodi hetan apoiu tanba AHDMTL halibur ema barak, atu nune’e membru sira bele sente netik no konsumu.

“Ho apoiu ne’e, balun ami tau ba armazen hodi responde ba membru sira-ne’ebé halibur iha ne’e. Balun ami sei fó apoiu ba sira seluk ne’ebé iha munisípiu tolu hanesan Ermera, Liquiça no Bobonaro,” nia informa.

Entretantu apoiu ne’ebé Komunidade Salesiano Don Bosco Comoro fó ba ema ho defisiénsia matan iha Asosiasaun Halibur Defisiénsia Matan Timor-Leste (AHDMTL) ne’e mak hanesan Ayam Buras moris ne’e iha 45, Supermie kaixa 20 no fo’os saka 70.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here