Transporte para iha Estasionamentu iha área Banco Nasionál Ultramarinho (BNU) nia oin. Imajen Tatoli/Dok

DILI, 19 agostu 2021 (TATOLI)-Adjuntu Prezidente Autoridade Munisípiu Dili, António Moniz Calau, informa durante fulan janeiru to’o jullu 2021, Munisípiu Dili halibur  ona $12,000.86  hosi taxa atividade estasionamentu transporte, karreta ho motór.

“Kona-ba taxa ba fatin estasionamentu sira iha Dili, tinan ne’e, tun tanba ho situasaun COVID-19, ita konta janeiru, fevereiru 2021, ita hala’o servisu tanba seidauk aplika serka sanitária, mai iha abríl, maiu, juñu, ita aplika ona serka sanitária no konfinamentu obrigatóriu, entaun servisu la la’o, ita komesa fali fulan klaran juñu ne’ebé reseita hosi janeiru to’o jullu, hamutuk $12,000.86,” António Moniz Calau informa ba Agência Tatoli iha nia knaar fatin, Mataduro, Dili, kinta ne’e.

Nia afirma, Munisípiu Dili fatin estasionamentu iha lima hanesan, Merkadu Taibesi, Avenida liberdade da Imprensa, Avenida 20 de maiu, Avenida Martires da Patria no rua 25 de abríl.

“Ita-nia zona estasionamentu sira ne’e estabelese bazeia ba diploma ministeriál konjunta númeru 48/2017 no númeru 16/2018 ne’ebé mak aprova kriasaun zona estasionamentu durasaun limitada iha Munisípiu Dili,” nia dehan.

Kona-ba ba billete sira ne’ebé koloka ba karreta no motór ne’e, hahú hosi $0,10 to’o $0,75. Tuir tipu transporte karreta mikrolete inklui karreta ki’ik sira oras ida selu $0,25, kamioneta oras ida selu $0,50, karreta boot hanesan tronton, oras ida $0,75, no motorizada oras ida selu $0,10.

“Funsionáriu totál ba fatin estasionamentu lima iha Munisípiu Dili hamutuk 56, kada fatin estasionamentu, ita tau ema na’in-lima ka neen depende ba fatin ne’ebé movimentu barak hanesan merkadu ita tau ema na’in-neen lima funsionáriu no ida supervizór fatin sira seluk koloka na’in-tolu ka haat,” nia esplika.

Nia afirma, situasaun balu ne’ebé funsionáriu sira enfrenta iha terrenu mak movimentu barak funsionáriu sira labele kobre hotu, maibé Munisípiu Dili sei rezolve problema sira ne’e iha tinan oin tanba tuir planu 2022 Munisípiu Dili sei aumenta tan fatin estasionamentu foun rua; ida iha Largo Lecidere no  ida seluk iha Cristo Rei ne’ebé funsionáriu mós sei aumenta.

“Ita-nia funsionáriu sira kazuál, maibé sira hetan saláriu mensál tanba uluk ita rekruta sira ho bens servisu, maibé agora tama ona ba saláriu vensimentu ne’ebé ita promove sira ba ekiparadu grau F ba funsionáriu simu saláriu $160, supervizór Grau E saláriu $210,” nia dehan.

Autoridade Munisípiu Dili agradese tebes ba públiku ne’ebé fó ona kontribuisaun liuhosi taxa estasionamentu sira, maske ki’ik maibé ida-ne’e valór boot tebes ba Munisípiu Dili no Governu Sentrál, tanba ne’e mak husu komunidade uza fatin estasionamentu tuir lei no bainhira para iha fatin estasionamentu sira tenke selu.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here