iklan

NASIONÁL, EKONOMIA, HEADLINE, POLÍTIKA

Espasu limitadu, MPM sei buka fatin halibur ajénsia autónoma tutela

Espasu limitadu, MPM sei buka fatin halibur ajénsia autónoma tutela

Ministru Petróleu no Minerál, Víctor da Conceição Soares. Imajen TATOLI/Egas Cristóvão

DILI, 19 agostu 2021 (TATOLI)–Ministériu Petróleu no Minerál (MPM) nia edifísiu daudaun ne’e ho espasu limitadu, tanba ne’e Konsellu Ministru delibera ona hodi fó biban ba Ministru Petróleu no Minerál, Víctor da Conceição Soares buka fatin ida hodi halibur hamutuk ajénsia autónoma tutela.

“Espasu ba ami limitadu, entaun ami butuk hamutuk de’it, tanba ne’e Konsellu Ministru horiseik delibera katak neneik sei buka espasu atubele instala ami-nia instituisaun autómu sira ne’ebé tutela ba ministériu tenke tau hamutuk nomós estrutura ministériu tenke hadi’a inklui sei rekruta funsionáriu permanente,” Ministru Víctor, hateten, iha Ótel Timor, kinta ne’e.

Notísia relevante: KM autoriza MPM buka fatin konsentra servisu área petróleu

Tuir governante ne’e, razaun MPM presiza fatin atu ministériu ne’ebé jere riku-soin ne’e tenke servisu ho dignidade.

“Iha nasaun seluk, ministériu ne’ebé jere osan-mean, osan-mutin, mina-rai no gas, ninia fatin servisu luxu no kuandu ita konvida ema mai ministériu hanesan loos baraka oan ida. Tanba ne’e Konsellu Ministru delibera atu buka instalasaun dignu, atu nune’e ita-nia dignidade nu’udar Estadu ne’ebé hanesan na’in ba riku-soin Timór, tenke iha instalasaun ho dignu atubele simu parseiru sira iha fatin ne’ebé ema bele fiar ita,” nia akresenta.

Nune’e, MPM daudaun ne’e buka ona fatin no iha faze negosiasaun iha fatin balun iha sentru kapitál.

“Daudaun ne’e konstrusaun balun halo hela iha Dili Financial Center Páteo, ne’e hanoin ona atu negosia aban bainrua kuandu konstrusaun ne’e ramata, karik sei konsege, maibé proposta ne’ebé delibera, ha’u husu atu Governu fó konfiansa atubele halo negosiasaun ho empreza sira halo konstrusaun ne’e maibé negosiasaun seidauk finál,” nia hatutan.

Ministru dehan, Governu fó apoiu ona hodi MPM aluga de’it ka sosa edifísiu.

“Maibé labele sosa dala-ida, aluga tiha mak sosa neneik,” nia tenik.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!