Hakerek na’in, Afonso Soares.

Husi:

Afonso Soares

 

Hanesan ita hotu akompaña, polémika ne’ebé daudaun ne’e mosu iha ita-nia sosiedade, liuhusi meiu komunikasaun sosiál sira mak eziste, kona-ba Komandante Tránzitu Munisípiu Dili ninia afirmasaun ne’ebé fó-sai ba públiku, hodi bandu sidadaun hotu atu labele tula labarik sira ho idade menus hosi tinan-hitu (7) ho motór. Afirmasaun ne’e hamosu reasaun balu, tantu husi sidadaun sira, nune’e mós husi reprezentante povu nian iha Parlamentu Nasionál, iha ne’ebé subliña liu situasaun kona-ba kapasidade ekonómika sidadaun sira-nian, atu kumpre prosedimentu legál ne’e.

Situasaun refere, tuir ha’u-nia perspetiva, ne’e sai nu’udar indikadór ida, ne’ebé presiza tau konsiderasaun hodi hola asaun ruma husi instituisaun kompetente Governu nian, atu oinsá bele kontribui ba ita-nia sosiedade ida ne’ebé prodús lei sira, ho karáter ezekutável (bele ezekuta), aliás, lei sira mak sosiál, kulturál, jeográfika no ekonomikamente posível atu implementa.

Timor-Leste nu’udar Estadu ida ne’ebé ninia sistema jurídiku adota família “Civil Law”, iha ne’ebé aprovasaun ba lei sira tenki tuir obra Charles de Montesquieu nian kona-ba “O Espírito das Leis”. Tuir obra refere, aprovasaun ba lei ruma iha país ne’ebé adota família refere, tenki tuir realidade fízika país ne’e nian, hanesan situasaun klimátika, tamañu terrenu ho nia kualidade, maneira moris sidadaun nian, limite ba liberdade sidadaun nian ne’ebé lei refere regula, iha ámbitu konviksaun relijioza, polítika no espíritu kulturál sira seluk nian, situasaun ekonómika, komersiál, kulturál, prátika konstumeira eh uzu sira, nsst.

Kódigu Estrada, ne’ebé aprova liuhusi Dekretu-Lei n.o 6/2003, loron 3 fulan-Abril, sura hahú husi ninia vijénsia to’o ohin-loron, eziste liu ona tinan sanulu-resin-ualu (18). Aprovasaun ba Kódigu refere iha altura ne’e, ho konsiderasaun ba realidade sosiál, kulturál, jeográfika, sosiál, ekonómika, infraestrutura, kostume no aspetu sira seluk. Durante períodu ida-ne’e, ita anota, iha ita-nia sosiedade, hosi tempu ba tempu, mudansa oioin no barak ona mak akontese, iha ne’ebé, loloos, ezije atu ajusta ita-nia kuadru legál sira, nune’e bele kontestualiza nafatin ho evolusaun sira refere. Ho nune’e, bainhira entidade balu hala’o nia devér, livre husi reasaun sira ho natureza kontraditória, haree katak polémika refere, destaka situasaun ida entre devér jurídiku-funsionál PNTL nian no kapasidade ekonómika sidadaun nian, iha ámbitu oinsá kumpri komandu legál iha Kódigu Estrada.

Husi observasaun ne’ebé anota, PNTL (Departamentu Tránzitu no Seguransa Rodoviária), liuhusi afirmasaun Sr. Komandante nian, nu’udar jestu ida atu asegura oinsá implementa lei ho efetivu no rigór, tanba ida-ne’e konstitui devér jurídiku-funsionál departamentu refere nian.

 Kestaun sira balu ne’ebé presiza hatene mak: kódigu ne’e eziste ona hahú husi tinan 2003, maibé agora mak foin efetiva ninia implementasaun. Indikadór sá mak sai baze hodi la implementa iha períodu tinan hirak liubá? Persentajen kona-ba asidente tráfegu no taxa mortalidade labarik ho idade menus husi tinan-hitu mak aas liu, nune’e sai determinante hodi implementa agora? Eh ignoránsia? Tansa ho idade lei ida nune’e, ohin-loron, sei nafatin preokupa kona-ba ignoránsia? Laiha meiu sira ne’ebé bele dezenvolve, hodi halakon sidadaun sira-nia ignoránsia?  Loloos, haree husi kapasidade ekonómika sidadaun sira-nian, akompaña mós ho evolusaun relevante sira seluk iha ita-nia sosiedade, sai ona determinante atu halo revizaun ba kódigu refere!

Maski nune’e, la signifika departamentu refere mak kompete atu revee, entretantu, membru sira  iha departamentu refere bele identifika situasaun sira mak la koerente ona ho realidade iha ita-nia kontestu no rekomenda ba Governu, liuhusi ministériu kompetente, hodi halo ajustamentu sira mak nesesáriu.

Iha ámbitu atu garante sidadaun sira-nia koñesimentu ba prosedimentu legál hirak ne’e, haree katak atividade kampaña kona-ba seguransa rodoviária no edukasaun ba sidadaun sira atu respeita lei rodoviária, nu’udar devér jurídiku-funsionál ida husi Departamentu Tránzitu no Seguransa Rodoviária nian, bazeia ba alínea c) artigu 19.o husi Dekretu-Lei n.o 9/2009, loron 18 fulan-Fevereiru, ne’ebé hetan alterasaun dahuluk husi Dekretu-Lei n.o 47/2020, loron 7 fulan-Outubru (Orgánika PNTL), nune’e, papél departamentu refere nian la’ós de’it ba atividade operasaun sira iha terrenu hodi identifika irregularidade rodoviária sira, maibé kampaña ba informasaun sira kona-ba Kódigu Estrada konstitui mós devér jurídiku-funsionál departamentu refere nian hodi hala’o atu, iha parte ida, permite sidadaun sira asesu no komprende prosedimentu legál sira no, iha parte seluk, identifika situasaun  ne’ebé determina ajustamentu ba Kódigu refere.

Rekoñese katak, kondutór/motorista hotu, tantu motór, nune’e mós kareta, liuhusi teste mak hetan karta kondusaun, ne’ebé hala’o iha Diresaun Nasionál Transporte Terrestre, entretantu matéria teste la kobre kondisaun sira hotu ne’e, nune’e mós mekanizmu teste seidauk adekuadu hodi garante kondutór ida atu hatene, ho forma detallu, prosedimentu legál sira refere.

Tuir kláuzula legál iha leten, devér departamentu refere nian, kobre mós prátika sira oinsá atu implementa situasaun hirak ne’ebé, pur enkuantu, vigora hela iha kódigu refere, ho razaun bainhira falta implementasaun, konstitui violasaun ida no, juridikamente, ajente sira mak responsabiliza ba funsaun sira departamentu refere nian, bele asumi responsabilidade, bazeia ba Regulamentu Dixiplinár PNTL nian, ne’ebé aprova husi Dekretu-Lei n.o 44/2020, loron 7 fulan-Outubru.

Nune’e, la sala mós bainhira PNTL kumpri lei ne’ebé sei vigora hela iha ita-nia país. Maski nune’e, mekanizmu ida ne’ebé loloos tenki halo mak revizaun ba parte balu iha kódigu refere ne’ebé kontradís ho realidade sira iha ita-nia país no implementasaun ho efetivu no rigór ba kondisaun hirak ne’ebé prevee hela iha kódigu, maibé infrasaun iha parte rodoviária nian, husi tempu ba tempu, nafatin akontese, hanesan kondusaun motor/kareta husi menoridade, meiu transporte ne’ebé la prenxe rekizitu atu halo sirkulasaun, veíkulu sira ne’ebé transporta ema no sasan liu kapasidade, nsst.

Ho kondisaun sira hotu mak hato’o iha leten, ha’u hanoin tempu la apropriadu ona atu garante implementasaun ba artigu 85.o husi Kódigu Estrada nian, ho razaun sira, hanesan i) maioria família iha país ne’e mak iha kapasidade to’o de’it atu hola motor, nune’e laiha alternativu seluk se la tula ona sira ho motor ba eskola, ospitál no fatin seluk mak presiza ii) infrasaun barak liu sei komete husi sidadaun sira ho rendimentu ekonomia ki’ik no sira mak sei selu koima bebeik no barak liu, maski halerik ba nesesidade sira seluk iii) ita-nia espasu jeográfiku, liuliu iha Díli, se família hotu tenki tula oan ho kareta, implika ba konjestaun (kemacetan) iha estrada sira, estasionamentu iha fatin públiku sira (eskola, ospitál, nsst.) no kontribui ba diminuisaun pontualidade serbidór Estadu nian, iha instituisaun ne’ebé sira ida-idak integra, nune’e mós efeitu negativu sira seluk.

Nune’e, ha’u sujere ba parte relevante sira, atu bele tetu didi’ak no, karik nesesáriu, bele adota mekanizmu sira ne’ebé propoin iha leten, hodi kontribui ba ita-nia sosiedade, atu bele iha lei sira ne’ebé ho natureza kontestuál, realístiku no aseitável, iha ne’ebé, ho forma naturál, bele evita reasaun kontra husi parte relevante sira, iha ámbitu atuasaun sira ne’ebé PNTL hala’o nu’udar jestu hodi kumpri ninia devér funsionál sira.

Hakerek na’in lisensiadu iha Direito husi UNTL/FUP no konklui mós pós-graduasaun ida husi Fakuldade Direito Universidade Nova Lisboa no, atualmente, nu’udar Asesór Jurídiku iha KFP.

Referénsia sira:

  • Dekretu-Lei n.o 47/2020, loron 7 fulan-Outubru, ne’ebé aprova Orgánika Ministériu Interiór no Alterasaun daruak ba Dekretu-Lei n.o 9/2009, loron 18 fulan-Fevereiru, Orgánika PTNL nian
  • Dekretu-Lei n.o 10/2009, loron 18 fulan-Fevereiru, Rejime Salariál PNTL nian;
  • Dekretu-Lei n.o 44/2020, loron 7 fulan-Outubru, ne’ebé aprova Regulamentu ba Dixiplina PNTL nian;
  • MONTESQUIEU, O Espírito das Leis, Martins Fontes Editora Ltda., São Paulo, 1993;

HAKEREK NO HATÁN

Please enter your comment!
Please enter your name here