Prezidente Conselho de Imprensa (CI), Virgílio da Silva Guterres ‘Lamukan’. Imajen Tatoli/Osória Marques.

DILI, 19 agostu 2021 (TATOLI)—Prezidente Conselho de Imprensa (CI), Virgílio da Silva Guterres ‘Lamukan’, informa enkontru entre Conselho de Imprensa ho asosiasaun jornalista no mídia ka meu komunikasaun sosiál sira hodi ko’alia kona-ba preparasaun ba komemorasaun tinan 46 (16 outubru 1975-2021) trajédia Balibo Five iha Timor-Leste.

“Ohin, ita hala’o enkontru ho mídia eletróniku, imprime no online sira hodi ko’alia kona-ba preoarasauun ba komemorasaun trajédia Balibo Five iha Timor-Leste, ne’ebé CI halo kooperasaun servisu ho Asosiasaun Jornalista Timor Lorosa’e (AJTL) no Timor-Leste Press Union (TLPU). Ohin mós, CI aprezenta rezultadu monitorizasaun obra jornalístiku iha períodu pandemia COVID-19 ne’e,” Virgílio da Silva Guterres hateten ba jornalista sira, iha salaun Conselho de Imprensa (CI), Quintal Boot, Dili, kinta ne’e.

Prezidente Conselho de Imprensa (CI), Virgílio da Silva Guterres ‘Lamukan’, hamutuk ho Konsilleiru Otelio Ote no Expedito dias Ximenes, no Diretór Ezekutivu CI, Rigoberto Monteiro. Imajen Tatoli/Osória Marques.

Kona-ba preparasaun no liberdade imprensa nian, Virgílio Guterres informa, plaka ne’ebé matebian Sergio Vieira de Melo, momentu ne’ebá hanesan Xefe Governu tranzisaun asina ona, maibé iha momentu ne’ebá seidauk tau iha sirkulu rotunda Avenida Liberdade Imprensa hahú hosi rotunda CCD nian ne’ebé estátua proklamadór Francisco Xavier hatuur ona ba ne’e to’o iha rotunda Becora nian.

“Ami agora seidauk tau plaka iha sirkulu iha rotunda Avó Francisco Xavier nia estátua hatuur ba ne’e. Entaun plaka sira-ne’e halo tiha ona inklui naran hosi jornalista sira-ne’ebé mate iha Timor-Leste ne’ebé halo kobertura mai to’o 1999. Jornalista na’in lima mate iha Balibo ne’ebé ho naran Balibo V no Agus Muliawan, sira-nia naran ne’ebá hotu,” nia dehan.

Iha enkontru ne’e, hosi parte Conselho de Imprensa (CI) fahe hanoin oinsá meu komunikasaun sosiál sira halo kobertura ein-jerál, liu-liu durante iha pandemia COVID-19 nia laran ne’e.

Nune’e mós, Conselho de Imprensa (CI) informa kona-bá atividade sira-ne’ebé CI planea atu halo mak liu-liu kona-ba komemorasaun Loron Mundiál Fotógrafu nian (World Photo Day) ne’ebé mundu selebra iha kada loron 19 agostu iha kada tinan.

Nia dehan, Conselho de Imprensa (CI) sei lansa kampaña kona-bá atu kontinua re-estende Avenida Liberdade Imprensa ne’ebé hahú hosi rotunda CCD (Merkadu Lama) nian to’o iha rotunda Becora nian, no sei halo kampaña kona-bá prémiu Balibo Five ne’ebé posivelmente sei halo iha Balibo iha loron 16 ouutubru, bainhira situasaun ne’e normaliza ona.

Maibé, nia dehan, bainhira Estadu sei implementa serka sanitaria no konfinamentu domisiliáriu mak atividade komemorasaun trajedia Balibo Five ne’e sei halo de’it iha Kapitál Dili.

“Kona-bá prémiu nafatin halo avaliasaun no rezultadu sei públika iha Jornál Repúblika, nune’e manan na’in sira foti de’it iha ne’e,” nia hateten.

Diretór Ezekutivu Conselho de Imprensa (CI), Rigoberto Monteiro, hatutan CI sei lansa kampaña ida atu kontinua halo advokásia ba atividade liberdade nasionál ne’ebé sei hahú iha rotunda Centro Convenção Dili (CCD) nian to’o rotunda Becora nian maibé Governu halo badak to’o de’it iha Kuluhun.

“Hakarak informa katak, iha 2002, matebian Sergio Vieira de Melo asina tiha ona plaka ida, iha plaka ne’e refleta jornalista 12 na naran, nune’e plaka ne’ebé matebian asina ne’e, ita sei lori tau iha rotunda Becora ne’ebá,” nia dehan.

Tanba ne’e, Conselho de Imprensa (CI) husu ba mídia sira hotu atu akompaña no partisipa iha prosesu halo advokasia kona-bá Avenida Liberdade Imprensa ne’ebé hahú hosi rotunda CCD-Merkadu Lama nian to’o iha rotunda Becora nian ne’e, nune’e Governu bele tau iha konsiderasaun.

Balibo Five

Entretantu, iha loron 16 outubru 1975 mosu trajédia iha Balibo ne’ebé jornalista australianu no neozelandeze na’in-lima hetan oho hosi militár indonéziu bainhira halo knaar jornalizmu atu transmite ba kanál televizaun australianu, ne’ebé ikusmai trajédia ne’e koñesidu ho Balibo Five.

Jornalista hirak ne’e maka Greg Shackleton (reportér), Tony Stewart (gravadór lian), Gary Cunningham (cameraman) hosi mídia HSV-7 (Seven Network) Melbourne, no Brian Peters (cameraman) no Malcolm Rennie (reportér) hosi mídia TCN-9 (Nine Network) Sydney.

Notísia Relevante: CNC-CI komemora tinan 45 Balibo Five ho ezibisaun fotografia

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here