Progresu konstrusaun UKL iha Suku Lahomea, Postu Administrativu Maliana, Munisípiu Bobonaro, segunda (09/08). Imajen Tatoli/Sérgio da Cruz.

COVALIMA, 19  agostu 2021 (TATOLI)-Iha fulan agostu ne’e nia rohan,  Programa Nasionál Dezenvolvimentu Suku (PNDS) sei konstrui uma ba kbiit laek (UKL) iha Postu administrativu hat iha Munisípiu Covalima.

Notísia Relevante : PNDS sei loke kotasaun ba projetu UKL

“Ami sei implementa hotu programa PNDS hodi konstrui   UKL ba família vulneravel sira iha Postu Administrativu  Maucatar, Suai Villa, Tilomar ho Fatumea. Prosesu agora foin loke kotasaun,”  Diretora delegasaun PNDS Munisípiu Covalima, Zélia Freitas da Conceição informa ba Agência Tatoli iha suku Camanasa, Munisípiu Covalima, kinta  ne’e.

Iha sorin seluk, Administradór Postu Administrativu Suai Villa, Laurentino  de Jesus hateten, atu implementa programa PNDS hodi konstrui UKL  iha Postu Suai Villa,  PNDS halo ona enkontru iha nivel postu no foin loke kotasaun  ba kompañia sira ne’ebé atu fornese materiál konstrusaun hodi konstrui UKL.

“Atu konstrui UKL ami halo ona enkontru no sei halo verifikasaun ba kompañia manan na’in ne’ebé sei fornese material konstrusaun atu  konstrui UKL,” Laurentino informa.

Xefi Suku Matai, João Amaral hateten, iha suku Matai, Postu Maucatar, PNDS sei konstrui UKL tolu ba família vulneravel. Tanba ne’e  sei halo planu hodi loke kotasaun ba kompañia.

Planu hosi PNDS iha tinan 2021, PNDS sei konstrui UKL 90 ba família vulneravel iha munisípiu Covalima ho total orsamentu $1,493,000.00.

Jornalista   : Celestina Teles

Editór        : Francisco Simões

HAKEREK NO HATÁN

Please enter your comment!
Please enter your name here