Xefe Kaza Sivíl Prezidénsia Repúblika, Francisco Maria de Vasconcelos, ho komitiva vizita Grupu Movimentu Agrikultura Progresivu iha Ainaro, kuarta (18/08).Imajen/Mídia PR

AINARO, 18 agostu 2021 (TATOLI)–Xefe Kaza Sivil Prezidénsia Repúblika, Francisco Maria de Vasconcelos, hateten, Governu presiza tetu proposta hosi grupu produtivu sira iha munisípiu hodi fó apoiu ba atividade produtivu sira.

“Ita presiza tetu filafali ema husu ka hatama proposta ita fó apoiu. Proposta ita hatán maibé oinsá se programa di’ak bele opta sai hanesan programa ministériu nian. Movimentu grupu produtivu sira ne’e la’ós Governu mak bele halo movimentu,” Xefe Kaza Sivil dehan bainhira vizita Grupu Produtivu Movimentu Agrikultura Progresivu, iha munisípiu Ainaro, kuarta ne’e.

Nia konsidera, Governu presiza halo indentifikasaun movimentu grupu hanesan agro-negósiu, peska no seluk tan atu sai hanesan programa iha munisípiu no to’o nível nasionál.

“Programa no hanoin di’ak, tenke integra iha planu Governu atu halo mobilizasaun maka’as no dezenvolvimentu ba ita-nia povu,” nia akresenta.

Nune’e, Xefe Kaza Sivil husu ba autoridade munisipál atubele fasilita enkontru entre Servisu Agrikultura, Sekretaria Estadu Formasaun Profisionál no Empregu (SEFOPE) no grupu produtivu sira hanesan Movimentu Agrikultura Progresivu hodi define polítika ne’ebé bele kanaliza rekursu sira atu lori benefísiu iha tempu naruk.

“Ha’u haksolok tanba joven sira balun lisensiatura iha área agrikultura, maibé sira la atrapalla atu buka osan sai funsionáriu públiku ka servisu iha Organizasaun Naun Governamentál, sira dehan katak rai ne’e mak ita-nia moris no rikusoin, rai ne’e mak bele dezenvolve bem estar. Ha’u hanoin inisiativa ne’e di’ak tebes atu dudu ba oin,” nia hatutan.

Tuir Xefe Kaza Sivil, Prezidente Repúblika sei la halo projetu atu fó apoiu ruma ba inisiativa komunidade, maibé sei uza majistratura influénsia atu sai tilun, matan no ibun populasaun atu hato’o ba Governu haree ho seriadade no fó apoiu ba inisiativa sira.

Iha biban hanesan, Koordenadór Movimentu Agrikultura Progresivu, Inácio da Cruz, hateten, grupu ne’e harii hosi lisensiadu área agrikultura ne’ebé halibur mós joven sira ne’ebé la kontinua eskola hodi halo atividade kuda modo oioin ba agro-negósiu hanesan mostarda, modo-mutin, repollu, alfase, tomate no seluk tan.

“Ami hahú hosi zero. Ami estabelese grupu ne’e ho fundu inísiu $100, ne’ebé ami deve hosi Prezidente Konsellu Joven Ainaro no to’o agora seidauk selu,” nia esplika ba Xefe Kaza Sivil no komitiva.

Nia dehan, laiha mákina modernu ruma mak suporta atividade produsaun ne’e, maibé konsege halo kanteiru ektare 25.

Antes ne’e, grupu ne’e hato’o ona proposta ba Ministériu Agrikultura no Peska (MAP), maibé seidauk hetan resposta atu apoiu tratór-liman no tratór kiik-oan hodi harahun-rai, kahur rai no atu halo kanteiru molok kuda modo.

“Ami laiha ona kbiit sosa sasán sira ne’e, ne’ebé ami husu ba Governu. Situasaun atuál halo rendimentu menus,” nia akresenta.

Nia agradese ba apoiu hosi Servisu Agrikultura Ainaro tanba apoiu rede protesaun 10.

Movimentu ne’e mós ko’alia ona ho Servisu Agrikultura Munisipál no SEFOPE munisipál ne’ebé atu loke formasaun iha área agrikultura ba joven sira, nune’e sira prontu oferese terrenu no apoiu atu fó formasaun.

Vizita Xefe Kaza Sivil akompaña hosi Ministru Edukasaun, Juventude no Desportu, Armindo Maia, Vise-Ministru Agrikultura no Peska, Abílio Xavier de Araújo, Vise-Ministra Solidariedade Sosiál no Inkluzaun, Signi Candrawati Verdial, Sekretáriu Estadu Formasaun no Empregu, Alarico de Rosário, Prezidente Komisaun F Parlamentu Nasionál, Noe da Silva Ximenes ‘Buka Tuir’, Prezidente Komisaun G, António Verdial inklui entidade relevante.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here