Komandante PNTL Baucau, Superintendente Xefe Armando Monteiro. Imajen TATOLI/Natalino Belo

BAUCAU, 18 agostu 2021 (TATOLI)–Ekipa Servisu Komandu Konjuntu Operasaun Koordenada  garante seguransa durante realizasaun retiru nasionál ne’ebé sei hala’o iha Uaibitai (foho matebian), postu Quelicai, munisípiu Baucau iha loron 20 to’o 22 agostu.

Komandante Polísia Nasionál Timor-Leste (PNTL) Baucau, Superintendente Xefe Armando Monteiro, hateten, ekipa konjunta kompostu hosi Komandu PNTL, FALINTIL-Forsa Defeza Timor-Leste (F-FDTL), Batallaun Orden Públiku (BOP) kompaña Bravo no Polísia Militár (PM).

“Hosi parte seguransa, ami-nia misaun mak oinsá atu asegura retiru ida-ne’e la’o sein iha impedimentu no planu ne’e preparadu no garantidu,” Superintendente Xefe hateten iha ninia knaar fatin, Villa nova, kuarta ne’e.

Ekipa Servisu ne’e iha semana kotuk  liuhosi Komandante operasaun hosi komponente terrestre F-FDTL, Komandu PNTL no BOP Baucau diskute planu no ohin realiza enkontru hodi koordena dia’k liután faze preparasaun, fó hanoin ba malu no hein implementasaun.

Nune’e, liuhosi planu define tarefa ne’ebé sei ezekuta, liuliu fó seguransa pesoál alta entidade sira ne’ebé partisipa retiru no seguransa iha dalan bainaka liu, seguransa fízika no fatin alojamentu sira ba bainaka sira inklui fó seguransa ba fatin retiru.

“Sei halo diskusaun iha nível tátika no sei fahe rekursu ne’ebé define ona tuir planu, nune’e hahú prepara lojíztika hodi apoia iha loron implementasaun,” nia akresenta.

Faze preparasaun hahú ona iha fulan-rua ba kotuk no ekipa hosi Gabinete Primeiru-Ministru (GPM) observa preparasaun iha terrenu hodi halo konsultasaun ho parte Komandu Konjuntu Operasaun, nune’e prepara forsa hotu hodi fó seguransa ba eventu ne’e.

Retiru nasionál ne’e organiza hosi GPM liuhosi Gabinete Apoia Sosiedade Sivil no tuir ajenda iha asuntu lubun ida mak sei debate hanesan edukasaun, ekonomia inklui kondisaun bázika ne’ebé sai prekupasaun komunidade iha ohin loron.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here