Xefe Komisaun Organizadora Formasaun Parlamentu Foin-sa’e, Cesarino Gonçalves . Imajen Tatoli/Arminda Fonseca

DILI, 18 agostu 2021 (TATOLI)-Sekretaria Estadu Juventude no Desportu (SEJD) liuhosi Diresaun Nasionál Informasaun Komunikasaun no Teknolojia (DNIKT) fó formasaun tékniku debate ba Parlamentu Foin-Sa’e na’in-119.

Xefe Komisaun Organizadora Formasaun Parlamentu Foin-Sa’e, Cesarino Gonçalves hateten, formasaun ne’e oinsá joven sira sai joven prátiku hahalok no saudavel tanba joven sira atu síviku ne’e tenke tuir.

“Formandu sira ne’ebé tuir formasaun ne’e loloos hamutuk 132, maibé tanba situasaun COVID-19 balu labele entaun hela de’it 119,” Cesarino Gonçalves ba Agência Tatoli iha salaun semináriu Maloa, Dili, kuarta ne’e.

Formasaun ne’ebé fó Parlamentu Foin-Sa’e mak hanesan diskursu públiku, téknika debate ho espetasaun hosi formasaun ne’e mak Parlamentu Foin-Sa’e bele atinje debate sira ho kualidade no halo diskursu ho di’ak.

Joven sira ne’ebé sai Parlamentu Foin-Sa’e ho mandatu tinan tolu, tanba ne’e atividade lima ne’ebé sira aprende mak hahú hosi formasaun atividade, formasaun refere iha pakote rua mak public speaking no tékniku debate, tuir enkontru bankada, komisaun, ba iha plenária no ikus órgaun soberania.

Partisipante Parlamentu Foin-Sa’e, Zelio Duarte Soares, agradese tebes bele involve hotu iha Parlamentu Foin-sa’e, tanba ne’e esperiénsia ne’ebé nia hetan bainhira fila sei aplika iha nia moris fatin.

“Ami mai tuir formasaun ne’e hili hosi Postu Administrativu tanba ne’e, esperiénsia ne’ebé ami hetan fila ami fahe fali ba maluk joven sira seluk nune’e sira mós bele kapasita sira-nia aan ho di’ak hodi dezenvolve rai ida-ne’e,” nia dehan.

Zelio Duarte Soares rasik hosi Munisípiu Ermera reprezenta Postu Administrativu Railaco, tanba ne’e isu ka problema sira ne’ebé nia foti hosi Postu Railaco aprezenta iha nia plenária mak hanesan Saúde, krime, no joven ba empregu.

Tuir rekizitu foin-sa’e sira ne’ebé atu tama ba membru Parlamentu Foin-sa’e mak idade hahú hosi tinan 12 to’o tinan 16, no tenke iha deklarasaun ida katak sira tenke orijen duni hosi Postu Administrativu, suku ka aldeia ne’ebé sira hela.

Formandu sira ne’ebé partisipa iha formasaun Parlamentu Foin-sa’e ne’e hosi  munisípiu 12 inklui Rejiaun Administrativa Espesiál Oé-Cusse Ambeno (RAEOA) maibé tanba situasaun COVID-19 maka munisípiu balu labele partisipa.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here