Ministru Ensinu Superiór, Siénsia no Kultura (MESSK), Longuinhos dos Santos. Imajen Tatoli/ Egas Cristóvão

DILI, 18 agostu 2021 (TATOLI)- Ministériu Ensinu Superiór, Siénsia no Kultura (MESSK) seidauk deside suspende atividade aula prejensiál ba ensinu superiór sira iha Munisípiu Dili tanba sei hein rekomendasaun hosi Ministériu Saúde (MS).

Notísia Relevante : Eskola ida iha Dili, detetadu besik na’in-50 pozitivu COVID-19

“Maske Ministériu Edukasaun Juventude no Desportu (MEJD) deside suspende provizóriu atividade aula prejensiál ba ensinu báziku no sekundária iha Munisípiu Dili, maibé ita seidauk foti desizaun ruma atu suspende hotu aula prejensiál ba ensinu superiór sira iha Dili tanba ita hein hela rekomendasaun hosi MS,” Ministériu MESSK, Longuinhos dos Santos, hateten ba jornalista-sira iha Palásiu Governu, Dili, kuarta ne’e.

Nia hatutan, relasiona ho kazu númeru COVID-19 ne’ebé agora sa’e iha Munisípiu Dili, parte MESSK rasik sei halo karta suspensaun atividade letiva prejensiál ba ensinu superiór sira iha Dili, maibé ida-ne’e fila-fali ba MS fó autorizasaun ka lae, mak foin haree konteúdu hosi karta ne’e rasik.

“Agora daudaun atividade aula prejensiál ba ensinu superiór sei kontinua, mas la’o tuir nafatin rekizitu sira ne’ebé ita tau ona katak estudante sira ne’ebé atu tuir aula prejensiál tenke hatudu kartaun vasina, sira ne’ebé seidauk simu vasina nafatin tuir aula online,” nia hateten.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here