Ai-teka ilegál ne’ebé Serbisu Ministériu Agrikultura no Peska (MAP) munisípiu Viqueque, prende hosi komunidade hamutuk metru kúbiku hitu, durante fulan jullu 2021. Imajen Tatoli/Vitorino Lopes da Costa.

VIQUEQUE, 18 agostu 2021 (TATOLI)—Durante 2021, Serbisu Ministériu Agrikultura no Peska (MAP) munisípiu Viqueque, halo apreensaun ba ai-teka metru kúbiku hitu hosi komunidade, tanba tesi ilegalmente no laiha dokumentu lisensa komersiál.

“Iha jullu, ita-nia funsionáriu guarda florestál prende tán ai-teka hamutuk metru kúbiku hitu, tanba kategoria ilegál,” Xefe Departementu MAP munisípiu Viqueque, Helder Daniel Amaral, hateten ba jornalista Agência Tatoli, iha edifísiu serbisu MAP, Beloi, kuarta ne’e.

Notísia relevante:Jullu, SERVE,I.P Viqueque rekolla $247

Ai-teka ne’ebé guarda florestál prende labele foti ona no sei tau iha patrimóniu Estadu. Kona-bá produtu Florestál, presiza iha tipu lisensa rua, primeiru lisensa sosiál no lisensa komersiál ne’ebé departamentu floresta entrega ba komunidade.

Iha esplikasaun hateten katak, tipu lisensa sosiál ne’e tesi metru kúbiku tolu hodi halo uma no lisensa komersiál tesi atu faan, maibé preisza iha dokumentu komersiál hanesan lisensa tesi no tula, no  ida-ne’e diresaun nasionál mak hatene.

Bainhira deteta komunidade tesi ai ilegál, parte frorestál sei prende no sei tau iha patrimóniu Estadu no  presesu lelaun, parte patrimóniu Estadu mak sei fó-sai ba públiku, bazeia ba despixu.

Parte florestál mós apela ba komunidade katak, ai ne’ebé moris naturál ka moris nanis ona, labele tesi, no bele tesi de’it mak ai ne’ebé komunidade kuda rasik tuir autorizasaun lei.

Durante 2016 guarde florestál Viqueque prende ai ne’ebé komunidade tesi ilegál hamutuk metru kúbiku 34.

Parte florestál munisipál hato’o ona relatóriu ba diresaun nasionál no agora daudaun ai sira ne’e tau hela iha parimóniu Estadu iha armazen Raitahu.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here