Deputado Bankada Fretilin, José Agostinho Sequeira Somocho. Imajen/Egas Cristovão

DILI, 18 agostu 2021 (TATOLI)—Reprezentante Povu iha uma fukun Parlamentu Nasionál (PN) husu Ministériu ba Asuntu Kombatente no Libertasaun Nasionál (MAKLN) no Konsellu Veteranu tenke buka hatene rezolve problema veteranu sira-nian tanba sira-nia kontribuisaun boot tebes ba rai ida-ne’e.

Notísia Relevante: Ekipa Nasionál halo verifikasaun ba dadus veteranu rejistadu iha 2009

Deputadu Bankada Frente Revolusionária Timor-Leste Independente (FRETILIN), José Agostinho Siqueira ‘Somotxo’ konsidera asuntu ne’e importante tebes atu estadu fó solusaun.

“Ha’u fiar katak veteranu sira-ne’ebé mate ona ne’e rejistadu mak mate. Uluk simu ona pensaun mak mate. Maibé sira-nia espoza, oan no família iha direitu tuir estatutu Konsellu Veteranu nian. Sira aprezenta ka la aprezenta maibé instituisaun tenke hatene no identifika ema sira-ne’ebé to’o ohin problema seidauk rezolve tanba barak mak hein hela atu simu nia aman nia pensaun,” Somotxo informa ba Agêncoa TATOLI, relasiona ho selebrasaun aniversáriu FALINTIL ba dala-46 ne’ebé sei selebra iha 20 agostu 2021.

Nia apela ba Ministériu ba Asuntu Kombatente Libertasaun Nasionál no Konsellu Veteranu atu haree asuntu ne’e, nune’e labele dada-naruk tanba sira dalaruma depende de’it ba pensaun ne’ebé estadu atribui.

Entretantu, bainbain iha plenária Parlamentu Nasionál, Deputadu Bankada Partidu Demokrátiku (PD), Mariano Assanami Sabino, husu estadu tenke buka-hatene no identifika veteranu sira-ne’ebé la rejista.

“Ita-nia aman veteranu barak mak la ba rejistu. Tuir loloos Estadu mak iha obrigasaun ba ema sira-ne’e, labele hein de’it hodi halo rejistrasaun. Tanba, ha’u hatene veteranu no juventude rezisténsia barak mak seidauk rejista,” Prezidente Partidu Demokrátiku ne’e fó hanoin beibeik ba Governu.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here