Sekretáriu Jerál Konsellu Munisipál Kombatente Libertasaun Nasionál Baucau, Manuel 'Alari' da Costa Soares. Imajen TATOLI/Natalino Belo

BAUCAU, 18 agostu 2021 (TATOLI)–Sekretáriu Jerál Konsellu Munisipál Kombatente Libertasaun Nasionál Baucau, Manuel ‘Alari’ da Costa Soares, enkoraja jerasaun Forsa Armada Libertasaun Nasionál Timor-Leste (FALINTIL) atu banati tuir luta liberta povu iha ukun an ida-ne’e.

“Apela ba jerasaun hosi veteranu nia oan sira hotu, pelumenus banati tuir inan-aman sira-nia sakrifísiu durante luta ba libertasaun pátria hodi harii nasaun Timor-Leste, agora sira hanesan jerasaun kontinuadór tenki prepara-an hodi kontribui sai autór ba libertasaun povu,” Alari hateten ba Agência TATOLI iha ninia knaar fatin, Villa antiga, kuarta ne’e.

Nia mós apela ba veteranu nia oan hotu, atu aprende no servisu maka’as sai autór importante ba libertasaun povu Timor-Leste.

“Tanba ne’e, veteranu nia oan labele tau an iha situasaun fó perigu ba moris iha futuru,” Alari fó hanoin.

Nune’e, nia husu labele envolve iha kualker aktu krime ne’ebé bele fó impaktu ba valorizasaun inan-aman nia luta ukun rasik an tanba bainhira halo krime, statutu Kombatente artigu 12 loke dalan atu kondena no sei hasai hotu previleju tomak ne’ebé Governu atribui ba veteranu sira.

Maski nune’e, Konsellu veteranu rasik halo esforsu tomak atu hakbesik jerasaun foun ba Estadu hanesan koordena ho Ministériu Edukasaun, Juventude no Desportu (MEJD) no Ministériu Ensinu Superior, Siénsia no Kultura (MESKK) hodi atribui bolsa estudu ba jerasaun veteranu hanesan maneira investimentu iha setór edukasaun.

Tuir Alari, bainhira veteranu nia oan sira asesu iha edukasaun, ba futuru bele realiza mehi atu liberta povu hosi kiak no mukit.

“Bolsa estudu tenki hahú hosi munisípiu hodi identifika poténsia veteranu nia oan ne’ebé iha vontade no hakarak kontinua estudu,” nia hatutan.

Selebrasaun aniversáriu FALINTIL ba dala-46 sei realiza iha loron sesta (20/08).

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here