Komandante PNTL Baucau, Superintendente Xefe Armando Monteiro. Imajen TATOLI/Natalino Belo

BAUCAU, 18 agostu 2021 (TATOLI)–Komandante Polísia Nasionál Timor-Leste (PNTL) munisípiu Baucau, Superintendente Xefe Armando Monteiro, alerta ba Komandante Eskuadra no membru Ofisiál Polísia Suku (OPS) atu intensiva movimentu komunidade sira ne’ebé tama sai rejiaun ne’e.

“Ita kontinua intensiva movimentu komunidade, liuliu sira ne’ebé hosi munisípiu seluk tama mai Baucau, ema ne’ebé mai la prenxe rekezitu hanesan dokumentu vasina kompleta, maka tenke submete teste swab,” Superintendente Xefe hateten iha ninia knaar fatin, kuarta ne’e.

Tuir Armando, asaun hirak ne’e hanesan parte ida atu komunidade sira ne’ebé halo movimentu livre hosi COVID-19, nune’e bele seguru ba família no komunidade ein jerál iha Baucau.

Aleinde ne’e, iha fulan-abríl Komandu PNTL Baucau simu orientasaun hosi Komandu Jerál atu OPS serbisu hamutuk ho líder komunitáriu no konsellu suku tomak hodi halo kampaña vasinasaun ba komunidade.

“Ohin ami alerta ba Komandante Eskuadra sira no apela mós ba membru sira, liuliu OPS ne’ebé serbisu hamutuk ho ita-nia Konsellu suku atu kontinua halo kampaña vasina nafatin, nune’e asegura povu sira,” nia akresenta.

Nune’e, nia husu ba komunidade sira, bainhira espalla informasaun kona-ba atendimentu iha postu vijilánsia Vemasse, tenki iha prova no faktu tanba PNTL labele responde ba akuzasaun komunidade ne’ebé laiha faktu.

“Sé de’it mak sente sai vítima ba aktu hosi membru sira iha terrenu, tenki hatudu prova, nune’e ita orienta atu foti medida,” Armando hatutan.

Komandu PNTL Baucau hola parte mós iha servisu CIGC Baucau hodi fó seguransa iha postu vijilánsia Vemasse.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here