Plaka SERVE,I.P sukursál Bobonaro, kuarta (18/08). Imajen Tatoli/Sérgio da Cruz.

BOBONARO, 18 agostu 2021 (TATOLI)—Hahú hosi janeiru to’o jullu, Serbisu Rejistu Verifikasaun Empreziriál, Institutu Públiku (SERVE,I.P), sukursál Bobonaro, hatama reseita ba kofre Estadu hamutuk $3.833,45.

Hosi númeru ne’e, iha fulan janeiru rekolla $761, fevreiru $917,45, marsu $86, abril $102, maiu $639, juñu $901 no jullu 427 inklui fulan agostu provizoriamente $123.

Notísia relevante:Uma-ka’in 6.196 iha Bobonaro seidauk asesu eletrisidade

“Fundu hirak-ne’e hetan hosi renovasaun karta lisensa serbisu, lisensa sektorál hanesan Benkel, Restaurante, Mebel, produsaun Batako, Galon no seluk tan,” Koordenadár SERVE,I.P sukursál Bobonaro, Domingos Mau Soro, informa ba jornalista Agência Tatoli, kuarta ne’e.

Periúdu serka sanitária durante fulan rua iha Bobonaro, SERVE,I.P halo de’it atendimentu rejistu online, bazeia ba dekretu Prezidente Repúblika númeru 6/2021 no dekretu Governu númeru 15/2021, ne’ebé la permite atribuisaun dokumentu direta, hodi evita kontáziu COVID-19.

“Fulan rua ne’e mak halo ita-nia reseita menus, maibé hafoin hakotu serka sanitaria, ita halo xamada ba kliente-sira, mai foti dokumentu orijinál, balun mai renova dokumentu, nune’e ita-nia reseita komesa sa’e fali to’o $639 iha maiu,” nia esplika.

Kritéria rejistu empreza lokál, nasionál, internasionál no negosiante kiik ne’ebé atu mai rejistu iha SERVE,I.P hodi asesu ba lisensa serbisu, tuir lei, empreza ida bele foti de’it durasaun tempu tinan lima no tinan ida selu taxa $45 enkuantu to’o tinan lima $225.

Nia husu ba emprezáriu-sira ne’ebé atu hahú negósiu kiik no ba sira ne’ebé seidauk rejistu atu mai halo rejistrasaun tanba SERVE,I.P sai liman-ain Ministériu Koordenador Asuntu Ekonómiku (MKAE), Institutu Apoia Dezembolvimentu Emprezarial (IADE) no Banku Nasionál Komérsiu Timor-Leste (BNCTL) fasilita emprezáriu no negosiante kiik-sira asesu kréditu.

Hahú hosi jullu 2020 to 2021 SERVE,I.P Bobonaro rejista emprezáriu foun  276, renovasaun hamutuk 338,  empreza ne’ebe mai halo altersaun ba estatutu ka aumenta  atividade  hamutuk 138.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here