Estudante sira hosi Institute Of Business (IOB) hala'o limpeza jerál hosi Jardín Motael, Largo Lecidere to'o Ponte Prezidente B.J Habibie, Bidau Santa-Ana Dili, Imajen Tatoli/ Arminda Fonseca

DILI, 18 agostu 2021 (TATOLI)-Estudante sira hosi  Institute of  Business (IOB), kuarta ne’e, hala’o limpeza jerál hahú hosi Jardín Motael to’o ponte  B.J. Habibie, Bidau Santa-Ana, Dili.

Dosente Fakuldade Ekonomia IOB, Marcos Pinto Romeo, limpeza jerál ne’e inisiativa ida hosi estudante sira rasik prepara komemorasaun aniversáriu FALINTIL ba dala-46 (20 agostu 1975-20 agostu 2021).

“Ami halo limpeza jerál tanba haree katak durante serka sanitária, ita-nia fatin públiku sira hanesan Jardín Motael, Largo Lecidere no Ponte B.J. Habibie fo’er  namkari no butuk, entaun ami identifika no ohin ami ba fatin hirak ne’e,” Marcos Pinto Romeo hateten.

Nia hatutan, atividade limpeza jerál ne’ebé ohin estudante IOB sira hala’o ne’e loron ida de’it no semana oin mai mak identifika fali fatin kontinua halo limpeza ba preparasaun loron 30 agostu, hodi komemora loron istóriku  konsulta popular (Referendu).

Estudante IOB hosi Fakuldade tolu maka envolve iha atividade limpeza jerál, kompostu hosi estudante  Fakuldade Ekonomia, Otelaria Turizmu no Informasaun Komunikasaun Teknolojia (ICT-sigla portugés).

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here