Diretor Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso.Imajen/Joanico de Araújo.

DILI, 18 agostu 2021 (TATOLI)—Diretór Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso, apresia ho Embaixadór Uniaun Europeia (UE), Andrew Jacobs, ne’ebé hala’o vizita no haree direta AHDMTL nia kondisaun.

Notísia Relevante: Iha Timor-Leste, membru AHDMTL hamutuk na’in-14.828

“Apresia ho vizita Embaixadór Uniaun Europeia nian mai haree ami-nia fatin direta no hatene kondisaun hosi organizasaun ida-ne’e nian. Entaun iha vizita ne’e ami informa difikuldade ne’ebé durante ne’e ami enfrenta,” Gaspar Afonso hateten ba Agência TATOLI, liuhusi telefónika, kuarta ne’e.

Iha biban ne’e, Diretór AHDMTL ne’e informa ba diplomata ne’e katak AHDMTL to’o agora seidauk iha fatin própriu hodi halo servisu, parte operasionál mós laiha no fatin daudaun ne’e sira aluga de’it inklui transporte mós laiha, maske iha karreta ida maibé tuan ona.

“Bainhira nia rona hotu tiha ami-nia preokupasaun sira, nia kompromitidu no iha vontade tebes atu ajuda ami. Tanba ami mós seidauk hetan doadór ne’ebé bele ajuda ami iha parte programasaun nian no atividade oioin hanesan letra braillle no mós grupu artezenatu sira no resiklazen ne’ebé ami planea ona,” nia dehan.

AHDMTL nia esperasa iha futuru hakarak halo kooperasaun ka halo parseria di’ak ho Embaixadór Uniun Europeia iha Timor-Leste.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here