Formandu sira tuir fotmasaun iha Sentru Formasaun Eagle Global Transformation (EGT). Imajen/Espesiál.

DILI18 agostu 2021 (TATOLI)—Sentru Formasaun Eagle Global Transformation (EGT), deside suspende provisóriu atividade formasaun liuhosi aula prezensiál hahú hosi 17 to’o 30 agostu tinan ne’e, maibé formasaun kontinua la’o liuhosi online.

“Aminia sentru formasaun, dadaun ne’e suspende hela atividade formasaun tanbá Governu liuhosi Ministériu Edukasaun, Juventude no Desportu, ohin fó sai ona despaixu katak atividade ba prosesu aprendizajen hotu suspende, maibé aminia atividade formasaun kontinua la’o liuhosi online,” Chief Executive Officer Sentru Formasaun Eagle Global Transformation (EGT), Natalia de Vasconcelos, hateten ba Agência Tatoli, via telefónika, kuarta ne’e.

Nia informa, durante hala’o atividade formasaun liuhosi aula prezensiál ne’e, sentru formasaun ne’e sempre kumpre regra prevensaun COVID-19 hosi Governu tanbá sentru ne’e iha Ministériu Edukasaun, Juventude Desportu nia mahon.

Formandu ne’ebé tuir formasaun iha tinan ne’e hamutuk na’in20 ne’ebé daudaun ne’e tuir hela formasaun iha área lingua inglés, TOEFL ITP, mandarin no hosi númeru ne’e formandu mai hosi estudante, joven sira.

Eagle Global Transformation (EGT), estabelese iha tinan 2009 ne’ebé funda hosi Aquilino Ribeiro Fraga Guterres (Ete-Uku). Sentru ne’e harii ho objetivu atu forma timor-oan liu-liu iha área edukasaun, nune’e bainhira ramata estudu sira bele iha koñesimentu hodi kompete iha merkadu nasionál no internasionál.

Totál formandu ne’ebé tuir formasaun iha sentru ne’e hamutuk 100resin no hosi númeru ne’e iha formandu na’in28 hosi TOEFL nian, ne’ebé rekomenda hosi Embaixada Amerika, hodi ba tuir bolsa estudu iha Embaixada Amerika nian.

Totál funsionáriu no formadór hamutuk na’in14 no hosi númeru ne’e, formadór sira mai hosi esperiénsia kada área iha sentru ne’e rasik. Enkuantu, formandu sira mai hosi estudante, funsionáriu no joven sira.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here