Ministru Saúde Interinu atuál Vise-Ministru Saúde, Bonifácio Maukoli dos Reis. Imajen Tatoli/Antonio Goncalves.

DILI, 18 agostu 2021 (TATOLI)—Vise-Ministru Saúde, Bonifácio ‘Maucoli’ dos Reis, hateten Timor-Leste (TL) sei enfrenta problema menus fasilidade no fatin, bainhira kazu COVID-19 aumenta makaas.

“Bainhira kazu COVID-19 ne’e aumenta makaas mak ita sei enfrenta problema  kona-bá fatin no mós ba ekipamentu-sira,” Bonifacio ‘Maucoli’ dos Reis, hateten iha abertura enkontru avaliasaun kampaña vasinasaun COVID-19  iha munisípu Dili, ne’ebé hala’o iha otél Novo Turizmu, kuarta ne’e.

Notísia relevante:COVID-19: óbitu rua, pozitivu 226 no ativu 2.507

Oras-ne’e daudaun, parte Ministériu Saúde haree katak, fasilidade hanesan ventiladór sei sufisiente hela tanba iha unidade 25 mak instaladu iha Lahane no Vera Cruz hamutuk ho oksijéniu.

Governu esforsu nafatin no serbisu hamutuk ho Organizasaun Mundiál Saúde (OMS) inklui  ajénsia internasionál-sira atu haree hodi prepara kondisaun ba situasaun ne’ebé la espera.

Alende ne’e, Governu mós iha hela osan atu hola tán ekipamentu, nune’e prepara fatin bainhira kazu aumenta bele responde tuir kapasidade ne’ebé iha.

Antes ne’e, Sentru Integradu Jestaun Krize (SIJK) fó-sai katak, ospitalizasaun no mortalidade dezde loron 01 marsu 2021, iha ona ema hamutuk na’in 321 ho moras COVID-19 mak presiza ospitalizasaun.

Númeru ospitalizasaun ne’e inklui de’it ema-sira ho moras moderadu, grave no krítiku ne’ebé presiza halo tratamentu iha fasilidade saúde espesializadu ba COVID-19.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here