Sidonio João da Silva Pereira.

Hosi:

Sidonio João da Silva Pereira

Luta hasoru kutun corona (SARS-CoV2) seidauk to’o nia rohan, mundu kontinua haka’as-an hodi hasoru laloran. Esforsu hotu halo ho esperansa ida katak loron ruma atividade umana bele fila fali ba normál, maibé lamentavelmente, to’o agora seidauk iha sinál ruma ne’ebé fó sai husi autoridade sanitária mundiál ka Organizasaun Mundiál Saúde (OMS) kona-ba bainhira maka mehi iha leten bele sai realidade.

Timor Leste liu husi nia Governu esforsa-an atu mehi ne’ebé mundu tomak hein katak karik loron ruma atividade ema nia bele ba fali hanesan bai–bain, maske hasoru dezafiu oin-oin, Estadu i Governu kontinua haka’as-an atu satan pandemia ne’e liuhusi meiu preventiva oin-oin inklui kampaña vasinasaun ba populasaun hotu ne’ebé elegivél atu simu vasina ne’ebé nasaun hili.

Vasina maka hanesan arma poderoza liu ona ne’ebé nasaun tomak iha mundu  hili atu satan virus ka kutun corona (SARS-CoV2) nia propagasaun i evita nia emar sira sofre  konsekuénsia husi virus ne’e rasik hanesan moras sai todan i mate.

Husi kedas virus corona (SARS-CoV2) ne’e mosu, terminolojia vasina sai hanesan tópiku interesante ba sientista sira no mós ba ema hotu iha sira nia dada lian loron-loron nian, tantu iha uma, dalan, servisu fatin, eskola, hemu kafé fatin i atividade seluk seluk tan. Tempu muda i to’o mai ohin loron, hahú husi fulan hirak ikus ne’e nia laran, komunidade sientífika sira komesa diskute no konsentra sira-nia hanoin kona-ba  karik sei sona tan doze datoluk ka “booster dose”.

Doze datoluk (booster dose) hanesan doze estra atu reforsa imunidade iha populasaun hirak ne’ebé simu remata ona doze daruak ba kada tipu vasina ne’ebé nasaun idak-idak hili hodi introdús ba nia protokolu vasina nian i administra ba kada sidadaun nia isin lolon.

Tempu la’o no muda, virus ne’e rasik sofre mos mutasaun ho variante tipu oin-oin de’it, inklui variante Delta ne’ebé konsidera perigozu liu i hamate ema wain ba wain  ho lais tebes, tuir siénsia ko’alia. Prezensa variante Delta halo nasaun bo’o t no riku  sira preokupa maka’as tanba sira konsidera ida ne’e hanesan senáriu ne’ebé aat liu ona husi virus corona nia evolusaun. Preokupasaun ne’e rasik obriga “High and middle income country” sira balun foti desizaun i aprova hodi introdús doze datoluk ka “Booster dose” ba nia ema sira ne’ebé sira konsidera elejivél atu simu. Ezemplu:

Israel ne’ebé uza vasina tipu mRNA (Pfizer-BioNTech ho Moderna), hahú hosi jullu sona ona doze datoluk ba pasiente sira ho status inmunocompromido ka (defisiénsia imunológica) ho razaun tanba hosi tempu ba tempu hatudu katak sistema defeza falla iha pasiente hirak ne’e maske simu ona doze daruak i sira sofre maka’as no todan tebes bainhira hetan infesaun husi virus corona ka moras COVID 19.

Iha Israel, analiza ba dadus prelimanáriu ne’ebé halo hosi Ministériu Saúde hatudu katak; 42% husi vasina ne’ebé sira uza ne’e nia nivel protesaun tun hasoru infesaun COVID 19, i 60% pasiente sira monu ba estadu grave hosi sira ne’ebé simu ona vasina dala rua.  Iha 1 agostu,  Israel hahú ona sona doze datoluk ba nia ema sira ho idade 65 ba leten hafoin fulan lima intervalu husi doze daruak, tanba konsidera katak vasina PfiZer-BioNTech nia efikasia menus kontra variante Delta ne’ebé agora daudaun reprezenta maiór parte husi infesaun COVID 19 iha Israel. “Ami la hatene exatamente to’o grau hira husi vasina ne’e bele ajuda, maibé to’o agora realidade hatudu katak nia nivel protesaun signifikativamente menus.” Semana rua nia laran de’it sira deside tan sona mós doze datoluk ne’e ba ema ho tinan 50 mai leten.

Repúblika Domínika uza vasina SINOVAC iha nia protokolu vasina nian, hanesan nasaun dahuluk husi América Latina ne’ebé hahú sona doze da toluk ba nia ema sira, i ida ne’e komesa ho funsionário saúde sira. Autoridade Dominakana esplika katak ba sira ne’ebé atu simu doze datoluk, sei simu vasina seluk husi doze dahuluk no daruak ne’ebé simu ona ho razaun atu kontra variante ne’ebé kontasioza liu.

Xile, nasaun iha Amérika latina ida ne’ebé susesu iha implementasaun kampaña vasinasaun iha mundu i uza vasina tipu Coronavac no AstraZeneca iha nia protokolu. Hahú ona doze datoluk iha loron 11 agostu ho AstraZeneca ba ema sira ho idade liu 86 ne’ebé simu ona vasina iha fulan marsu, nune’e mos pasiente hirak ne’ebé ho sistema imunitáriu fraku sei simu doze datoluk ho Pfizer/BioNTech. Iha sorin seluk ba hirak ne’ebé ho tinan 55 mai leten sei simu vasina AstraZenaca iha loron 20 fulan ida ne’e tuir kalendáriu ne’ebé autoridade publika.

Uruguai uza Coronavac iha nia protokolu vasina,  tuir komunikadu imprensa  Governu Uruguai liuhosi Komisaun Nasionál Assesoria ba vasina no grupu Adhoc ho Ministériu Saúde aprova ona katak sei sona doze datoluk ba ema hotu ne’ebé simu ona vasina eskema dahuluk  ho Coronavac-Sinovac. To’o agora vasina ne’ebé aprova ona hodi uza iha nasaun ne’e maka Pfizer-BioNTech, AstraZeneca i Coronavac.

Alemaña uza vasina Pfizer-BioNTech, Moderna, AstraZeneca i Jansen iha nia protokolu, i anúnsia sei hahú nia planu sona doze datoluk iha fulan-setembru oin mai ho vasina tipu Pfizer ka Moderna ba ema ho tinan 60 ba leten no ema hirak ne’ebé vulneravel liu.

Suésia mós afirma katak sira sei hahú sona doze datoluk iha fulan-setembru ba ema ho risku aas no iha tinan oin sei sona ba populasaun tomak.

Áustria foti ona desizaun katak sei aplika doze datoluk iha fulan-outubru nia klaran, i tarjetu dahuluk ba sira ho risku aas ne’ebé simu tina ona vasina iha fulan-janeiru liu-bá.

Estadus Unidos Amérika liuhusi nia ajénsia ba “Food and Drug Administration (FDA) ho Center for Disease Control and Prevention (CDC)” hateten iha 8 jullu katak nia ema sira ne’ebé simu ona vasina kompletu la presiza hetan tan doze reforsa ka “ booster dose” ba COVID 19 maibé ofisiál husi “Top infectious disease” Anthony Fauci defende katak Amerikanu sira ne’ebé ho imunocompromido ka sistema imune fraku dala ruma bele presiza estra-doze.

Inglaterra to’o agora bazikamente uza vasina AstraZeneca hanesan vasina prinsipál hodi sona ba nia ema sira. Pozisaun konaba sona doze datoluk ba populasaun tomak, “Concelho provisional Join Committee on Vaccination and Immunization/ JCVI fó sai katak sei vasina fali iha fulan setembru tanba ho razaun doze datoluk sei ajuda hodi manten protesaun kontra COVID 19 i variante foun ba ema ho risku bo’ot antes tama ba invernu “Espertu sira iha vasina  rekomenda ba ema kuaze miliaun 30 ne’ebé vulneravél liu sei simu doze datoluk, ba ida ne’e sei kobre ema husi idade 50 ba leten no labarik sira ho tinan 16 mai leten ne’ebé prenxe ona rekezitu simu vasina kontra gripe nian, maibé planu ne’e sei hein desizaun finál karik sei akontese iha inisiu fulan-setembru.

Fransa deside iha fulan-abril 2021 i sona ona doze datoluk ba nia ema sira ne’ebé ho estatus imunocompromido (sistema imune fraku) ho tempu intervalu semana haat hosi doze daruak, i dadus hatudu katak resposta imunitária aumenta 44% husi pasiente sira ne’ebé la responde di’ak ba doze dahuluk no daruak. Tuir mai iha jullu 2021 sira komesa tan sona doze datoluk ba ema hirak ne’ebé ho idade 80 mai leten maibé to’o  agora seidauk iha planu atu sona ba populasaun jerál.

Hungaria husi loron 1 fulan-agostu hahú ona sona doze datoluk ba nia ema sira ho intervalu semana haat husi doze daruak, i nia protokolu rekomenda katak bele uza kahur tipu vasina ba doze datoluk nian (signifika doze dahuluk i daruak ho vasina seluk no doze datoluk ho vasina ketak) maibé, autoridade sira realsa katak desizaun ikus iha dotór sira nia liman. Iha sikun seluk rekomendasaun ne’e rasik hamosu mos diskusaun ka debate maka’as pro-kontra entre espertu sira iha rai ne’e.

Nasaun sira iha Ázia, balun mos komesa ona anúnsia atu uza doze datoluk ba nia sidadaun sira, ezemplu:

Indonézia ne’ebé uza SINOVAC hanesan vasina prinsipál kontra COVID 19 konsidera sei fó doze datoluk atu reforsa imuinidade, tanba estudu hatudu katak “Antibody” husi doze rua ne’ebé simu uluk ne’e  “desbosta” ka lakon neneik tuir tempu la’o.

Kambodia sei oferese entre AstraZeneca ho SINOVAC hanesan doze datoluk hodi kontra COVID 19 no afirma doze datoluk ne’e sei fó ba ema “frontline” sira hamutuk 500.000 to’o milaun ida.

Singapura tuir planu sei hahú sona doze datoluk iha tinan ida ne’e nia rohan, se la’e iha inisiu tinan oin, bainhira presiza.

Maske nasaun lubun ida deside ho nia polítika rasik bazea ba idak-idak nia situasaun no nesesidade, maibé oinsá ajénsia internasionál sira ne’ebé responsabiliza ba saúde, hahán no aimoruk, espertu sira nia hanoin no haree i sira nia pozisaun ba situasaun ida ne’e.

Pozisaun husi World Health Organization (WHO) Center for Disease Control & Prevention (CDC), Food and Drug Administration Agency (FDA), European Center for Disease Control & Prevention (ECDC) i European Medicine Agency (EMA).

OMS ofisiálmente seidauk pronúnsia buat ruma katak iha duni nesesidade atu sona tan doze datoluk ka lae? Maibé Diretór Jerál OMS Dr.Tedros Adhanom Ghebreyesus husu, karik iha nesesidade atu aplika doze datoluk, bele hein to’o fulan setembru nia rohan i haree lai pelumenus 10% hosi populasaun iha nasaun hotu vasina tiha lai ho doze dahuluk i daruak ne’ebé la’o daudauk hela. (Ángela Reyes  6 Agosto, 2021 CNN Español).

CDC i FDA iha fulan-jullu liu ba kontra deklarasaun husi empreza fabrikante vasina Pfizer-BioNTech  ne’ebé afirma ema hirak be simu tiha ona doze daruak husi vasina tipu ARNm dala ruma sei simu tan fali doze datoluk “Booster shot” atu reforsa imunidade ho intervalu fulan neen to’o 12 hosi doze ne’ebé sona uluk tiha ona, maibé hafoin fulan ida liu tiha FDA i CDC rasik aprova ona planu sona doze datoluk ne’e ba pasiente sira ho status imunocompromido ka imunidade fraku, hanesan sira be halo traplantes rins no seluk tan. Hosi sorin seluk fali deklarasaun konjunta ne’ebé halo husi;

EMA i ECDC hateten agora daudaun sei sedu liu atu konfirma bele ka lae presiza doze datoluk atu reforsa  imunidade kontra COVID 19, bainhira? tanba sá? seidauk iha dadus sufisiente ne’ebé sustenta, i estudu sira la’o daudaun hela seidauk afirma atu ema hatene no kompriende to’o bainhira nivel protesaun husi vasina sira ne’e iha ema nia isin lolon,  nune’e mós propagasaun husi variante sira ne’ebé la’o daudaun.

Pozisaun husi espertu sira:

Amy Flaxman, Investigadora husi Universidade Oxford-The Jenner Institute, liuhusi estudu preprint “Tolerability and Immunogenicity after a late second dose or a Third dose of ChadOx1 nCoV-19 (AZD1222) haktuir doze datoluk aumenta “Antibody” iha isin lolon i nia efikásia sei aas liu hafoin simu doze daruak i sira defende katak sei aumenta resposta husi sélula T “T cell” (Linfósitu T).

Elisabeth Mahase MSc in Science Communication from Imperial College London and BSc Biomedical science hanesan clinical news reporter iha The BMJ  fó sai katak; doze datoluk ka “brooster shot” iha resposta imune maibé, dala ruma sei la presiza.

Jorge Geffner, husi Departamento de Microbiología, Parasitología e Inmunología de  Facultad de Medicina de  Universidad de Buenos Aires e investigador prinsipál de Conselho Nacional de Investigaciones Científicas i Técnicas aponta evidénsia atuál la hatudu tenki fó doze datoluk ba populasaun jerál eseptu sira ne’ebé ho estatus imunocompromido ka sistema imune fraku.

Elena Obiete i Leda Guzzi, Infectologista, i membro hosi Sociedade Argentina de Infectologia (SADI), afirma mos katak populasaun jerál seidauk bele determina bele simu ka lae doze datoluk maibé konkorda katak loos, se aplika ba ema ho idade bo’ot  ka ho defisiénsia iha sistema imune.

Marcos López Hoyos, presidente de la Sociedad Española de Inmunología, jefe de Servico Imunologia de Hospital Universitario Marqués de Valdecilla afirma siénsia sei investiga hela situasaun ida ne’e katak bele uza doze datoluk ka la’e ou karik aplika vasina anualmente, parese ba grupu populasaun bele aplika, maibé seidauk hatene loloos bain hira? ba sé? i oinsá?

Anthony Stephen Fauci OMRI, hanesan American physician-scientist and immunologist serving as the Director of the National Institute of Allergy and Infectious Diseases and the Chief Medical Advisor  ba prezidente Joe Biden  aponta katak ne’e estrema importante ba sira atu avansa ho doze datoluk espesialmente aplika ba  pasiente hirak ne’ebé nia sistema imune fraku.

Samiran Panda Director & Scientista – G/National AIDS Research Institute (NARI)/Indian Council of Medical Research (ICMR) hateten se kampaña produtora vasina sira hakarak rekorre ba doze datoluk atu reforsa sistema imune hafoin simu doze daruak, tenke bazeia ba dadus liga ho memória imunolojia.

Dr Giridhara R Babu, professor and the Head of life course epidemiology at the Public Health Foundation of India, ko’alia katak presiza estuda i hare didi’ak katak doze datoluk “booster dose” nia efeitu ne’e sei ajuda duni kontra moras ne’e,  hafoin bele deside uza ka lae.

Sintesis: To’o agora seidauk iha dadus sientífiku ne’ebé suporta planu doze datoluk ka “booster shoot” atu sona ba populasaun tomak relasiona ho nia benefísiu kontra COVID 19.  Loos, ba pasiente sira ho sistema imune fraku iha dadus balun ne’ebé sustenta, maibé atu deside adekuadamente presiza iha dadus hosi ensaiu klíniku ne’ebé hatudu ka prova efikasia i seguridade hosi doze datoluk ne’e rasik. Presiza dadus kompletu relasiona ho impaktu ba komplikasaun no óbito i ninia efeito adversu ka “efek samping”.

Tenki iha mos informasaun kle’an kona ba tempu intervalu ne’ebé konvinente liuhosi doze daruak, seluk fali, presiza haree ho nia seguridade uza doze datoluk ho vasina tipu seluk hosi ida ne’ebé simu antes, i oinsá nia komportamentu hasoru variante ka mutasaun husi virus ne’e rasik.

Ikus liu, presiza dadus kona-ba nia durasaun imunidade iha diferente grupu pasiente sira tuir idade no fatór risku sira hodi sai hanesan baze forte atu aplika doze datoluk (booster dose) iha komunidade ka nasaun ida. Por tanto, la sufisiente hola desizaun ida bazea  de’it ba nia impaktu iha sistema imunitariu ka (Antibody ) iha ran.

Hakerek na’in: Master in Investigation of Immunology & Staff of Emergency Department at Guido Valadares National Hospital (HNGV). 

Referénsia

https://www.reuters.com/world/middle-east/israel-offers-pfizer-covid-19-vaccine-booster-shots-adults-risk-2021-07-11/

https://www.ynetnews.com/health_science/article/bytq34n0u https://m-jpost-com.cdn.ampproject.org/c/s/m.jpost.com/breaking-news/coronavirus-in-israel-430-new-cases-147-percent-of-tests-positive-674215/amp
https://www.timesofisrael.com/health-officials-weighing-whether-to-wait-for-3rd-vaccine-dose-tailored-to-delta/ https://ourworldindata.org/coronavirus/country/israel

https://www.france24.com/en/live-news/20210729-israel-to-offer-3rd-covid-jab-for-over-60s-pm   https://www.timesofisrael.com/expert-panel-said-set-to-recommend-covid-booster-shots-for-israelis-over-50/

https://news.cgtn.com/news/2021-02-24/Dominica-receives-first-batch-of-Chinese-COVID-19-vaccines-Y8vdcJJbBS/index.html

https://covid19.trackvaccines.org/country/dominican-republic/

https://cnnespanol.cnn.com/2021/07/01/republica-dominicana-tercera-doze-vacuna-covid-19-orix/

https://www.bbc.com/news/world-latin-america-56731801?piano-modal

https://www.vox.com/22309620/chile-covid-19-vaccination-campaign

https://www.unicef.org/lac/en/press-releases/chile-receives-first-shipment-vaccines-against-covid-19-through-covax

https://www.gub.uy/ministériu-salud-publica/comunicacion/noticias/tercera-doze-vacunacion-kontra-covid-19 https://covid19.trackvaccines.org/country/uruguay/

https://en.wikipedia.org/wiki/COVID-19_vaccination_in_Germany https://www.nytimes.com/2021/08/02/world/europe/coronavirus-booster-shots-germany.html

https://es.euronews.com/2021/08/02/alemania-apuesta-por-una-tercera-doze-a-partir-de-septiembre-e-israel-comienza-ya-a-aplic https://www.reuters.com/business/healthcare-pharmaceuticals/moderna-jj-make-up-bulk-germanys-2022-extra-vaccine-purchases-ministry-paper-2021-06-30/

https://www.rt.com/news/530995-sweden-plans-covid-booster-shots/

https://www.thelocal.com/20210805/austria-planning-covid-booster-shots-for-autumn/

https://www.reuters.com/business/healthcare-pharmaceuticals/countries-weigh-need-booster-covid-19-shots-2021-08-05/

https://papers.ssrn.com/sol3/papers.cfm?abstract_id=3873839

https://www.bmj.com/content/373/bmj.n1659

https://www.gov.uk/government/publications/jcvi-interim-advice-on-a-potential-coronavirus-covid-19-booster-vaccine-programme-for-winter-2021-to-2022/jcvi-interim-advice-potential-covid-19-booster-vaccine-programme-winter-2021-to-2022#fnref:1
https://www.bbc.com/news/health-57667987
https://www.england.nhs.uk/coronavirus/wp-content/uploads/sites/52/2021/07/C1327-covid-19-vaccination-autumn-winter-phase-3-planning.pdf

https://solidaritessante.gouv.fr/IMG/pdf/dgs_urgent_n43_vaccination_modalites_d_administration_des_rappels.pdf
https://www.nejm.org/doi/full/10.1056/NEJMc2108861

https://www.france24.com/en/europe/20210804-france-plans-rollout-of-covid-vaccine-booster-shots-%E2%80%93-so-far-only-for-the-vulnerable 

https://hungarytoday.hu/hungary-third-booster-vaccination-campaign-debate/

https://www.reuters.com/business/healthcare-pharmaceuticals/indonesia-considers-covid-19-booster-shots-wider-use-govt-ofisiál-2021-07-27/

https://www.reuters.com/world/asia-pacific/cambodia-mix-vaccines-booster-shots-fight-covid-2021-08-01/

https://www.reuters.com/business/healthcare-pharmaceuticals/countries-weigh-need-booster-covid-19-shots-2021-08-05/

https://www.cidrap.umn.edu/news-perspective/2021/07/cdc-fda-contradict-pfizer-covid-19-vaccine-booster https://www.fda.gov/news-events/press-announcements/coronavirus-covid-19-update-fda-authorizes-additional-vaccine-dose-certain-immunocompromised

https://www.ema.europa.eu/en/news/ema-ecdc-update-covid-19

https://www.medpagetoday.com/opinion/vinay-prasad/93565

https://www.redaccionmedica.com/secciones/ministériu-sanidad/sanidad-valora-revacunar-con-financiacion-universal-en-base-a-3-variables 5687  https://reliefweb.int/report/world/interim-statement-covid-19-vaccine-booster-doses     https://www.nature.com/articles/d41586-021-02158-6

https://www.nytimes.com/2021/08/13/us/politics/cdc-covid-vaccine-third-dose.html

https://www.lanacion.com.ar/sociedad/si-o-no-que-opinan-expertos-argentinos-sobre-la-necesidad-de-una-tercera-doze-de-vacuna-kontra-el-nid10082021/

https://cadenaser.com/ser/2021/07/23/sociedad/1627044041_752225.html

https://www.lanacion.com.ar/sociedad/si-o-no-que-opinan-expertos-argentinos-sobre-la-necesidad-de-una-tercera-doze-de-vacuna-kontra-el-nid10082021/

HAKEREK NO HATÁN

Please enter your comment!
Please enter your name here