Reprezentante Organizasaun Mundiál Saúde (OMS) iha Timor-Leste, Arvind Mathur. Imajen Tatoli/Francisco Sony.

DILI, 17 agostu 2021 (TATOLI)-Reprezentante Organizasaun Mundiál Saúde (OMS) hamutuk ho NITAC iha Timor-Leste (TL) husu ba populasaun 683 ne’ebé simu ona vasina astrazeneca doze daruak iha loron 10 to’o 14 fulan-juñu atu simu filafali vasina foun tanba vasina ne’e la efetivu no efikasia.

“Ami ho  NITAC   rekomenda ba HNGV atu  informa ba ema  na’in 683  ne’ebé mak simu ona vasina laiha efikasia bele hakbesik an filafali ba HNGV hodi simu  fali vasina foun,’’ Reprezentante OMS iha Timor-Leste, Arvind Mathur ba TATOLI iha nia kna’ar fatin Caicoli Dili ohin.

Notísia Relevante:Vasinadu na’in 773 inválidu iha HNGV

Nia esplika OMS simu informasaun kona-ba vasina astrazeneca frasku ka vial 60 mak sai jeladu ne’e husi ekipa saúde HNGV ne’ebé hateten katak kazu ne’e akontese iha loron 10 to’o 14.

Iha tempu ne’ebá Ministériu Saúde, OMS ho NITAC halo kedas observasaun bá iha HNGV hodi deskobre katak temperature zelera menus husi númeru 4 to’o 10.

Tuir loloos temperature normal zelera nian maka entre 2 to’o 8 hodi rai vasina astrazeneca.

“Tuir OMS-nia haree katak insidente ne’ebé akontese iha HNGV ne’e  la’ós  ema nia erru maibé sistema nia erru tanba bainhira ita haree ba eletrisidade ladun diak ida ne’e mós tama ba iha sistema nian.Erru ida ne’e mós la’ós ita halo ho intensaun maibé ida ne’e la’ós intesaun no lisaun ne’ebé mak Ministériu Saúde no HNGV foti lisaun  mak daudaun ne’e aumenta tan vijilansia hodi haree ba zelera  liu husi manuál no eletrónika husi dader to’o lokraik ,’’ Nia esplika.

Arvind Mathur informa kazu ne’e akontese mós iha nasaun seluk, iha TL akontese de’it iha HNGV la inklui Munisípiu 11 no RAEOA tanba tuir relatóriu hatudu populasaun pursentu 71 maka simu ona vasina doze dahuluk no pursentu 44 maka simu doze daruak.

“Vasina ne’ebé sona ona ba ema 683 nee  la iha efetivu tanba vasina ne’e  la fó protesaun ruma ba ita  tanba ne’e mak sira presiza fali  vasina foun atu bele proteje ita-nia imunidade  no ita mós la bele halo prediksaun ba futuru saida mak akontese maibé haree ba kazu  husi ema 683 to’o agora sira seidauk relata kona-ba sira-nia moras,’’Nia hateten.

Reprezentante OMS ne’e apela ba ema hotu-hotu atu kuidadu sáude iha tempu pandemia globál covid-19 ho dalan ida maka tenke simu vasina tanba liu hosi  vasina bele hasa’e ema-nia imunidade hasoru moras oioin no mós moras corona rasik.

Notísia Relevante:PM orienta parte kompetente investiga vasina AstraZeneca aat iha HNGV

Jornalista :Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here