Inséndiu iha k’nua Modoho'o, suku Uailili, kuarta (23/06). Imajen/Espesiál

DILI17 agostu 2021 (TATOLI)—Sekretária Estadu Arte no Kultura (SEAK) liuhosi Dirasaun Nasionál Patrimóniu Kulturál, iha fulan jullu ne’e tun direta ba aldeia Uaturau de Cima, suku Uailili, postu administrativu Baucau villa, munisípiu Baucau, hodi observa no verifika ona kazu ahi han umalisan tolu (3) ne’ebé lokalizada iha knua Madoho’o.

Notísia Relevante: Vítima inséndiu iha Uailili seidauk hetan apoiu

“Iha fulan jullu ne’e, ekipa ba tiha ona halo observasaun no verifikasaun ba kazu ahi han umalisan iha Uailili maibé ekipa hein hela bainhira mak sira (uma lisan na’in) atu hatama proposta mai,” Diretór Nasionál Patrimóniu Kulturál, Gil Paulino S. Oliveira, hateten ba Agência Tatoli, iha nia knaar fatin, Avenida Portugal, Dili, tersa ne’e.

Tanba, nia dehan, automátikamente orsamentu ba apoiu ne’e sai hosi orsamentu subvensaun públika ne’ebé alokadu tuir ona nia trajetu, hanesan ami fahe ba 82 proposta ba uma lisan ne’e, ne’ebé laiha orsamentu seluk ona atu apoiu iha tinan 2021 ne’e. 

Proposta foun sira-ne’ebé tama ne’e, Sekretáriu Estadu Arte no Kultura sei prepara fali ba iha tinan 2022 inklui umalisan ne’ebé ahi han foin dada’uk ne’e, bainhira umalisan na’in sira hatama sirania proposta mai iha Sekretáriu Estadu Arte no Kultura.

Tanba Sekretáriu Estadu Arte no Kultura (SEAK) la halo umalisan fó ba komunidade, entaun nia rekezitu ida mak ekipa ba halo observasaun iha kampu, maibé umalisan na’in ne’e tenke halo proposta hodi submete ba SEAK.

Nia dehan, la’os uma-lisan na’in informa ona katak ahi han uma-lisan ne’e, iha parte Sekretáriu Estadu Arte no Kultura liu-liu iha Dirasaun Nasionál Patrimóniu Kulturál atu prosesa de’it hodi fó kedas apoiu, ne’e labele tanba la tuir rekizitu.

“Faktu mak sirania proposta enkamiña mai iha Sekretáriu Estadu Arte no Kultura nian hodi husu apoiu. Tanba, umalisan ne’e hetan insendiu hafoin mak prosesa. Tanba, apoiu nia kritériu fundamentu mak umalisan na’in hatama nia proposta mai, depois mak ekipa juri tun fali ba halo verifikasaun,” nia informa.

Aleinde umalisan na’in hatama ona proposta ba Sekretáriu Estadu Arte no Kultura, sira tenke halibur ona materiál balun, fetosan no umane sira tenke tur hamutuk ona hodi halo preparasaun.

Ho nune’e, bainhira ekipa ba halo observasaun katak ahi han ona umalisan maibé jerasaun sira iha filafali inisiativa hanesan tesi fali ai no ko’a fali du’ut, maibé sirania posibilidade la to’o atu harii filafali umalisan ne’e, entaun presiza hetan apoiu hosi Sekretáriu Estadu Arte no Kultura.

Ekipa ne’ebé ba halo ona observasaun ba ahi han umalisan iha Uailili mak hanesan Diretór Jerál, Sekretáriu Estadu Arte no Kultura, Manuel Smith, Xefe Departamentu, Dirasaun Nasionál Patrimóniu Kulturál, Eugenio Sarmentu, inklui Asesór Juridiku hosi Ministériu.

Entretantu, kazu ahi han mutuk umalisan tolu ne’ebé lokalizada iha knua Madoho’o, Uaili. Baucau, ne’ebé akontese iha kuarta (23/06), tuku 11:00 dadeer, hodi rezulta ahi han mutuk umalisan tolu, no uma rua afetadu, ne’ebé iha ema na’in35 mak sai vítima.

Notísia Relevante: Inséndiu iha Uailili, uma-lisan tolu no uma rua afetadu

Jornalista : Nelia Fernandes

Editór      : Cancio Ximenes

HAKEREK NO HATÁN

Please enter your comment!
Please enter your name here