Diretór Admistrasaun Rekursu Umanu munisípiu Baucau, João Bosco Ximenes entrega matéria teste ba Diretora SAS Baucau, Adriana Belo da Rosa, iha CCB, Tersa (17/08). Imajen TATOLI/Natalino Belo

BAUCAU, 17 agostu 2021 (TATOLI)–Diresaun Servisu Bee no Saneamentu (SAS, sigla portugés) Baucau ohin halo teste eskrita ba kandidatu 45, hanesan funsionáriu kontratadu ne’ebé kompete ba vaga neen hodi responde ba volume serbisu ne’ebé aumenta iha diresaun ne’e.

Diretora SAS Baucau, Adriana Belo da Rosa, hateten, SAS Baucau daudaun iha de’it funsionáriu ida iha área operasaun no manutensaun, nune’e bainhira presiza halo manutensaun ba kanu ruma ne’ebé hetan estragu, ema menus.

Diretora SAS Baucau, Adriana Belo da Rosa. Imajen TATOLI/Natalino Belo

“Presiza mós pesoál kontrola bomba bee, pesoál iha administrasaun, rekursu umanu no fasilitadór iha postu Venilale. Nesesita ba buat hirak ne’e mak ami halo rekrutamentu hamutuk ema neen,” Diretora SAS hateten iha Sentru Konvensaun Baucau (CCB, sigla portugés), Villa antiga, tersa ne’e.

Vaga neen ne’e kompostu hosi ida ba fasilitadór iha postu Venilale, ida ba tékniku planu dezeñu, ida ba tékniku administrasaun bee no saneametu, rua ba operasaun no manutensaun no ida ba motorista.

Maski nune’e, tuir Diretora ne’e rekrutamentu seidauk sufiente no tuir planu tinan 2022 sei iha rekrutamentu, nune’e bele kobre limitasaun ne’ebé durante ne’e SAS Baucau hasoru.

“Atu dehan responde ha’u sente lae, maibé atu redús volume serbisu ha’u hanoin bele,” Adriana hatutan.

Iha fatin hanesan, Diretór Administrasaun Rekursu Umanu munisípiu Baucau, João Bosco Ximenes, hateten, prosesu rekrutamentu relasiona ho vaga ba tékniku admistrativu grau E rua, tékniku profesiónal grau D ida, grau F área manutensaun rua no motorista rua.

Rekrutamentu ne’e hosi planu SAS no Rekursu Umanu munisípiu Baucau halo prosesu fazeadamente tuir regulamentu Dekretu-Lei númeru 3/2016 kona-ba desentralizasaun.

Diretór Administrasaun Rekursu Umanu munisípiu Baucau, João Bosco Ximenes. Imajen TATOLI/Natalino Belo

“Hafoin korresaun, hotu ita sei anúnsia fali kandidatu ne’ebé pasa tuir kritéria ne’ebé antes hakat ba faze orál,” nia tenik.

Matéria importante durante teste hanesan koñesementu jerál kona-ba Konstitusaun, servisu admistrasaun no matéria espesífiku ligadu ho vaga ne’ebé kompete ba hanesan tékniku bee no saneamentu.

Iha kandidatu hamutuk 45 mak kompete maibé hafoin avaliasaun dokumentu iha na’in-25 mak partisipa tuir teste eskrita.

Antes ne’e, ekipa verifikadór halo ona selesaun ba dokumentu atu hakat ba faze teste eskrita no bainhira iha kandidatu ne’ebé nia valor liu 52 sei kontinua ba faze entrevista.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here