Xefe Kaza Sivil, Francisco Maria de Vasconcelos no Ministru Edukasaun, Juventude no Desportu, Armindo Maia, akompaña ho entidade relevante, halo vizita ba EBF 1.2 Caisero, iha aldeia Ramerlau, Ainaro, tersa (17/08). Imajen TATOLI/Florêncio Miranda Ximenes

AINARO, 17 agostu 2021 (TATOLI)Koordenadór Eskola Bázika Filiál (EBF) 1.2 Caisero, Gil Vicente, agradese ba vizita Xefe Kaza Sivil, Francisco Maria de Vasconcelos, ne’ebé reprezenta Prezidente Repúblika, Francisco Guterres ‘Lú Olo’, haree kondisaun eskola iha aldeia Ramerlau, suku Foho Ai-lico, postu Hatu-udo, munisípiu Ainaro.

“Ami-nia eskola iha sala neen, maibé sala tolu kondisaun a’at tebes, ami tauk estudante sira tuir hela prosesu aprendizajen mak monu hanehan, laiha sala biblioteka no moru protesaun, tanba ne’e husu ba Prezidente Repúblika atu fó hanoin ba Governu atu hadi’a urjente,” Koodenadór hateten iha resintu eskola, iha aldeia Ramerlau, tersa ne’e.

Kona-ba livru, sufisiente ba estudante atu estuda iha eskola hosi klase 1 to’o 6 ano, ho totál estudante hamutuk 80, kompostu hosi mane 38 no feto 42.

Enkuantu, profesór ne’ebé hanorin iha eskola  ne’e hamutuk hitu, mane lima no feto rua,  profesór voluntáriu laiha no profesór reklamante ida.

EBF Caisero harii iha tinan 2007, liuhosi programa pakote referendu ne’ebé maihosi Eskola Bázika Sentrál (EBC, sigla portugés) Agapito da Costa, ne’ebé iha EBF hamutuk neen hanesan EBF 1,2 Ailora, Lesso, Beicale, Caisero, Bobe no Bui-fu, ho kondisaun infraestrutura a’at hotu.

Hatan ba preokupasaun ne’e, Xefe Kaza Sivil, Francisco Maria de Vasconcelos, hateten, Prezidente Repúblika preokupa tebes ho situasaun edukasaun iha rai-laran ne’ebé maioria infraestrurura bázika hanesan eskola sira ho kondisaun a’at, tanba ne’e sei buka solusaun.

“Ita-nia Prezidente Repúblika preokupa situasaun sira ne’e, ne’ebé sei informa ba Governu atubele fó atensaun sériu tanba kondisaun a’at loos. Tanba ne’e Ministru Edukasaun, Juventude no Desportu (MEJD) dehan ona katak tinan oin sei hadi’a infraestutura eskola ne’e atubele fó mahon ba estudante sira hodi hala’o prosesu aprendizajen,”nia hatutan.

Maibé, Xefe Kaza Sivil dehan, kona-ba eskola nia uma riin ne’ebé dodok ona, MEJD halo kompromisu ona atu hadi’a iha tempu badak atu labele lori ameasa ba profesór no estudante sira.

Nia konsidera, edukasaun mak fatór determinante atu lori rai ida ba oin no eskola halo ema sai sivilizadu, halo ema matenek no sai sidadaun util ba nasaun.

MEJD promote hadi’a tinan oin

Iha biban hanesan, Ministru Edukasaun, Juventude no Desportu, Armindo Maia, hateten, tempu besik bele hadi’a sala aula atu labele fó ameasa ba profesór no estudante sira.

“Ha’u kompromete tempu besik sei troka nia ai-riin sira, maibé ba infraestrutura jerál ne’e presiza orsamenta iha tinan oin mak foin bele realiza,” Governante ne’e afirma.

Iha tinan ne’e, Governu liuhosi MEJD prevee orsamentu millaun $28 atu harii no reabilita eskola hamutuk 200 ho sala aula 800 iha territóriu Timor-Leste.

“Ita haree prosesu la’o kle’ur oituan tanba COVID-19, ne’ebé ita labele halo levantamentu dadus, maibé prosesu lubuk ida iha ona aprovizionamentu hodi loke konkursu públiku,” nia dehan.

MEJD sei reabilita eskola hamutuk 16 no sala aula 52 iha munisípiu Ainaro, ne’ebé la inklui Centros de Aprendizagem e Formação Escolar (CAFE) iha tinan ne’e.

Polítika VIII Governu Konstitusionál mak hakarak atinje 90% infraestrutura edukativa ho kondisaun di’ak atu fasilita prosesu apredizajen.

“Ami mós loke vaga atu rekruta profesór 975 ne’ebé prosesu la’o daudaun no espera katak novembru tinan ne’e bele ramata ona prosesu  atubele responde ka troka profesór ne’ebé mate, invalidu no reforma, ne’ebé sei kontinua iha tinan 2022,” nia tenik.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here