Imajen/Media PR.

DILI, 17 agostu 2021 (TATOLI)—Parlamentu Nasionál (PN) liuhosi Komisaun Permanente, tersa ne’e aprova projetu deliberasaun atu debate alterasaun Lei Resensiamentu Eleitorál (LRE) ne’ebé veta hosi Prezidente Repúblika, Francisco Guterres Lú Olo.

Ho veta inkonstitusionalidade hosi Prezidente Repúblika entaun Komisaun Permanente aprova projetu deliberasaun ne’e ho rezultadu votasaun a-favór 25, kontra 0 no abstensaun 0.

Notísia Relevante: PN sei diskute hikas alterasaun lei resensiamentu eleitorál vetadu

Prezidente Parlamentu Nasionál, Aniceto Longuinhos Guterres Lopes. Imajen Tatoli/Francisco Sony.

“Projetu deliberasaun Komisaun Permanente númeru 4/V(3a) kona-ba realizasaun plenária estraordináriu ba efeitu apresiasaun foun dekretu parlamentu nian ne’ebé veta hosi Prezidente Repúblika. Plenária estraordinária hosi Komisaun Permanente nian sei realiza iha 24 agostu 2021,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Prezidente Parlamentu Nasionál fó-sai katak akordaun Tribunál Rekursu nian ho ofísiu kona-ba vetu inkonstitusionalidade.

“Ha’u esklarese liu de’it konteúdu tomak Prezidente Repúblika susita (suscita) inkonsitusionál pontu tolu ka artigu hamutuk tolu maibé Tribunál Rekursu deklara pontu ka artigu ida de’it mak inskontitusionál hosi diploma (alterasaun dahuluk ba lei resensiamentu eleitorál) ne’ebé Parlamentu Nasionál aprova,” nia subliña.

Nia dehan, PN iha loron 90 atu konfirma ka la konfirma ba apresiasaun foun ne’e maibé Lei Resensiamentu Eleitorál ne’e atu hakbesik daudaun ba eleisaun, nune’e fó biban ba órgaun eleitorál sira ho Governu halo preparasaun ba eleisaun nian inklui resensiamentu eleitorál bele la’o daudaun.

“Entaun ita la presiza to’o loron 90 ka hein to’o termina ita-nia períodu resesu. Ho razaun ida-ne’e mak meza submete mai iha Komisaun Permanente atu halo deliberasaun hodi konvoka plenária estraordináriu iha 24 agostu,” nia dehan.

Entretantu, Deputadu Bankada Congresso Nacional de Reconstrução de Timorense (CNRT), Deputadu Arão Noé de Jesus da Costa Amaral, esplika uma fukun iha loron 90 atu halo konfirmasaun votu ka halo alterasaun tanba vetu ne’e inskonstitusionalidade.

“Veta ne’e tanba inkonstitusionalidade entaun parlamentu tenke konsidera maibé tenke baixa nafatin ba Komisaun A halo apresiasaun,” Eis PPN ne’e fó hanoin.

Maibé Prezidente Parlamentu Nasionál, Deputadu Aniceto Guterres, la konkorda ho ideia ne’e tanba kestaun ne’e simples hela.

“Buat-ne’ebé ha’u intende no akompaña ne’e la baixa fila-fali ba Komisaun A tanba plenária mak tenke halo apresiasaun foun ne’e. Se plenária mak deside konfirma ka halo alterasaun entaun altera ba artigu ne’ebé inkonstitusionál ne’e,” nia fundamenta.

Bazea ba Rejimentu Parlamentu Nasionál (RPN) artigu 115 (Prosesu ba apresiasaun foun), númeru 1, esplika wainhira Prezidente Repúblika halo vetu, tuir númeru 1 artigu 88 hosi Konstituisaun, apresiasaun foun-ba dekretu hala’o iha prazu loron 90 sura hosi loron ne’ebé simu mensajen fundamentada, iha reuniaun ne’ebé Prezidente Parlamentu marka tuir nia inisiativa ka tuir rekerimentu hosi Deputado na’in-10 ka hosi bankda parlamentár.

Númeru 4 hosi artigu 115 RPN ne’e dehan, debate iha espesialidade sei to’o debate iha jeneralidade ramata, hatama proposta alterasaun ruma karik, no votasaun sei foka de’it ba artigu ne’ebé sai nu’udar objetu hosi proposta alterasaun.

Númeru 5 artigu refere hateten, testu ne’ebé iha deliberasaun daruak ne’e la hetan alterasaun la presiza haruka ba komisaun atu halo redasaun finál.

Purtantu, artigu 116 (Efeito hosi apresiasaun foun) hosi RPN, númeru 1 hateten karik Parlamentu konfirma nia votu liuhosi maioria absoluta hosi Deputadu eleitu, tuir númeru 2 artigu 88 hosi Konstituisaun, Prezidente da Repúblika tenke promulga diploma ne’e iha loron ualu (8) nia laran.

Númeru 2 hosi artigu 116 ne’e esplika, ba konfirmasaun diploma sira-ne’ebé ko’alia kona-ba matéria prevista iha artigu 95 Konstituisaun nian tenke iha maioria dois terços hosi Deputadu prezente sira, no ida-ne’e tenke liu maioria absoluta hosi Deputadu eleitu sira.

Númeruu 3 hosi artigu ne’e hatutan, karik Parlamentu hatama emenda ruma, dekretu foun ne’e sei haruka ba Prezidente Repúblika ba promulgasaun.

Númeru 4 hosi RPN artigu 116 ne’e argumenta, kazu laiha konfirmasaun votu Parlamentu nian, inisiativa lejizlativa ne’e labele hafoun iha sesaun lejizlativa ne’ebé la’o daudaun, salvo eleisaun foun ba Parlamentu Nasionál.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here