Prezidente CCI-TL, Oscar Lima. Imajen TATOLI/Francisco Sony

DILI, 17 agostu 2021 (TATOLI)—Prezidente Kámara Komérsiu no Indústria Timor-Leste (CCI-TL), Oscar Lima, konsidera atu atrai investidór mai investe Timor-Leste, presiza kria kondisaun hanesan hadi’a lejizlasaun kona-ba rai no sertifikadu rai hanesan seguransa ba investimentu.

“Sira bele mai investe iha ita-nia rai-laran, maibé atu mai tenke hadi’a buat balun hanesan rai. Agora lei rai sai ona, maibé tenke buka solusiona lalais sertifikadu rai,” Emprezáriu timor-oan ne’e hateten hafoin partisipa reuniaun koodenasaun entre liña ministeriál, setór privadu no kooperativa ba preparasaun Expo Dubai 2020, ne’ebé realiza iha salaun City 8, Manleuana, tersa ne’e.

Tuir nia, setifikadu rai importante atu sai garantia iha banku, tanba kuandu laiha, emprezáriu sira labele iha asesu kréditu ho montante boot no juru kiik.

“Tanba ne’e, hakarak ka lakohi setór privadu atu investe tenke iha garantia ida hafoin tinan-lima to’o sanulu, rezultadu investimentu osan tenke fila,” nia akresenta.

Notísia relevante: MKAE prezide reuniaun koordenasaun ba preparasaun Expo Dubai 2020

Iha sorin seluk nia konsidera eventu mundiál hanesan Expo Dubai importante tanba bele fa’an produtu lokál no introdús kultura no potensialidade Timor-Leste iha mundu.

“Importante ita tenke partisipa iha Expo Dubai atubele fa’an ita-nia imajen, tanba Timor-Leste ema ida nunka koñese, hanesan rai ida foin maka ukun rasik-an no ita hanesan rai kiik ne’e Governu hakarak ka lakohi tenke investe,” nia hatutan.

Nia dehan, partisipasaun Timor-Leste iha eventu mundiál ne’e sei lori investidór barak.

Ba kestaun ne’e, Prezidente CCI-TL garante setór privadu sira fó apoiu tomak tanba kuaze emprezáriu sira iha hotu indústria hahú kiik to’o boot.

“Presiza promove atu emprezáriu internasionál sira investe, tanba ita-nia turizmu iha barak mak seidauk explora, espera investidór bele mai investe,” Prezidente CCI-TL tenik.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here