Ministériu Obra Públiku (MOP), liuhosi Diretór munisipál Viqueque, Mário do Rego hala’o enkontru mobilizasaun, ho kompañia vensedór ba reabilitasaun no manutensaun estrada Ossu, iha salaun munisipál Viqueque, tersa (17/08/21). Imajen Tatoli/Vitorino Lopes da Costa.

VIQUEQUE, 17 agostu 2021 (TATOLI)—Ministériu Obra Públiku (MOP), liuhosi Diretór munisipál Viqueque, Mário do Rego husu kompañia rua ne’ebé mánan iha konkursu tenderizasaun ba projetu manutensaun no reabilitasaun estrada  rurál  iha postu adiministrativu Ossu, munisípiu Viqueque, tenke ho hatudu responsabilidade másima atu garante  kualidade konstrusaun.

“Prosesu tenderizasaun lori tempu naruk no kompañia ne’ebé kompete hamutuk 26, maibé kompañia rua mak sai manán na’in. Tanba ne’e ami garante katak, sei responsabiliza rezultadu liuliu garante kualidade,” Mário do Rego, hateten ba jornalista Agência Tatoli, hafoin enkontru mobilizasaun, iha salaun munisipál Viqueque, tersa ne’e.

Notísia relevante:MOP klarifika progresu konstrusaun estrada dirasaun Baucau-Viqueque

Tenderizasaun ba projetu estrada rurál ne’e loke iha fulan juñu 2021, no  iha ona faze  implementasaun, MOP sei monitoriza iha terrenu  atu hetan kualidade ne’ebé di’ak ho kuantidade ne’ebé tuir kontratu maka projetu estrada rua ne’e hanesan planu konkretu sei fui alkatraun.

Kompañia ne’ebé manan iha konkursu ne’e mak hanesan, kompañia Costa Ki sei halo manutensaun hosi Kastelo Ossu to’o Uagia ho distánsia kilómetru 3,4 no kompañia Manoko kaer estrada hosi Loihunu ba Uagia ho distánsia kilómetru 8,8.

Atu garante liu tan kualidade projetu rua ne’e, MOP sei halo supervizaun no R4d mak sei halo kontrollu, sei akompaña mós hosi Ajénsia Dezenvolvimentu Nasionál (ADN).

Tuir kontratu ba projetu rua durasaun tinan ida, hahú serbisu  iha fulan agostu 2021, manutensaun tinan ida, maibé konstrusaun fulan neen nian laran tenke finaliza.

Iha fatin hanesan, diretór Kompañia Manoko, Raimundo Madeira, promete sei garante kualidade projetu tanba Manoko iha esperiénsia barak ona no to’o oras ne’e seidauk iha problema ruma.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here