Xefe Suku Atuaben, postu administrativu Bobonaro, munisípiu Bobonaro. Imajen Tatoli/Sérgio da Cruz.

BOBONARO, 17 agostu 2021 (TATOLI)—Komunidade Atuaben, postu administrativu Bobonaro, munisípiu Bobonaro, presija infraestrutura bázika, hanesan estrada inklui bee moos.

“Ha’u-nia komunidade prekupa ho infraestrutura bázika, tanba tempu udan kondisaun estrada grave tebes. Sira mós presija bee moos,” Xefe Suku Atuaben, Januário Fernandes, informa ba jornalista Agênsia Tatoli, iha salaun eis Komdim, suku Ritabou, postu administrativu Maliana, tersa ne’e.

Notísia relevante:Uma-ka’in 6.196 iha Bobonaro seidauk asesu eletrisidade

Iha tempu udan, estrada fó impaktu  makás ba populasaun atu transporta produtu lokál ba merkadu, tanba ne’e husu ha Governu atu bele konsidera iha diskusaun Orsamentu Jerál Estadu (OJE), tuir-mai.

Komunidade mós difísil atu asesu ba bee moos, tanba tempu bailoron volume bee hosi posu menus, obrigadu  komunidade tenke kuru iha bee matan ida de’it no dala barak tenke konsumu bee foer.

Komunidade, Margarida Valente, triste tanba tempu naruk ona hela ho situasaun ne’e, tanba ne’e nia mós hameno hela ba Governu atu bele haree direta kondisaun real ne’e, nune’e bele tau iha konsiderasaun.

Totál populasaun iha suku Atuaben hamutuk 1.246 ho totál uma-ka’in 246.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here