Koordenadór SERVE, I.P RAEOA, Reinaldo Antonio Mendonça. Imajen Tatoli/Abilio Elo Nini.

OÉ-CUSSE, 17 agostu 2021 (TATOLI)—Hahú hosi janeiru to’o juñu 2021, Servisu Rejistrasaun no Verifikasaun Emprezariál (SERVE,I.P) Rejiaun Administrativa Espesiál Oé-Cusse Ambeno (RAEOA) kontibui reseita $2.947 ba kofre Estadu hosi fonte atividade rejistu komersiál.

“Hahú hosi janeiru-juñu 2021, Servisu Rejistrasaun no Verifikasaun Emprezariál Sukursál Oé-Cusse hatama reseita ba kofre Estadu hamutuk $2.947,” Koordenadór SERVE, I.P RAEOA, Reinaldo Antonio Mendonça, informa ba Ajência Tatoli, iha Santa Rosa, Suku Costa, Sub-Rejaiun Pante Makasar, Oé-Cusse, tersa ne’e.

Durante Governu lokea SERVE.IP, iha Oé-Cusse iha 2018, komunidade barak iha inisiativa halo rejistu foun ka loke lisensa ba atividade negósiu no empreza hanesan Enin,Unip.Lda, SA hamutuk 219, iha 2019 rejsitu foun 119, 2020 rejistu foun 99.

Iha tinan 2021, hosi janeiru to’o juñu rejistu foun hamutuk 101, no totál hosi 2018 to’o agostu 2021 ne’e, SERVE Sukursál Oé-Cusse simu rejistu foun hamutuk 538.

“Maske situasaun pandemia COVID-19 maibé SERVE sukursál Oé-Cusse kontinua hala’o atendimentu babain. Kada loron, ita simu kliente trata dokumentu komersiál minimál na’in-10 mai kraik. Ba kliente sira importante kumpre regulamentu Organizasaun Saúde Mundiál (OMS), uza máskara, fase liman ho sabaun no distasiamentu fíziku,” nia dehan.

Koordenadór ne’e apela ba komunidade Rejiaun Administrativa Espesiál Oé-Cusse Ambeno ne’ebé hala’o atividade komersiál atu kolabora, nune’e hakbesik-an ba SERVE sukursál RAEOA hodi bele loke lisensa negósiu, tanba tuir regulamentu Estadu nian bainhira siadaun hakarak hala’o atividade komersiál presiza iha legalidade.

Servisu Rejistrasaun no Verifikasaun Emprezariál sukursál Oé-Cusse mós, rekoñese negosiante mikro-médiu no empreza nivél alto sira barak hala’o atividade komersiál iha área remota partensia ba sub-rejionál sira maibé barak mak seidauk loke lisensa komersiál.

“SERVE,IP, kompromete bainhira situasaun normál sei kria ekipa ida atu tun ba baze hala’o senbilizasaun kona-ba vantajen no desvantajen hosi atividade ne’e iha rai laran,” nia dehan.

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here