Prezidente Komisaun C (Finansa Públika), Deputada Maria Angélica Rangel. Imajen/Egas Cristovao.

DILI, 17 agostu 2021 (TATOLI)—Membru Parlamentu Nasionál, Deputada Maria Angélica Rangel, propoin halo alterasaun ba artigu balun iha dekretu-Lei númeru 6/2003 tanba la relevante ho povu Timor-Leste nia realidade moris.

Deputada Bankada FRETILIN ne’e hateten, dekretu-Lei númeru 6/2003, 3 abríl kona-ba Kódigu Estrada nian iha artigu 85 ne’ebé regula labele transporta labarik sira ho motorizada.

Notísia Relevante: PNTL Prepara Proposta Altera Lei Kódigu Estrada

“Tanba iha dekretu-lei ne’e bandu labarik tinan 6 mai kraik labele uza motorizada. Ita haree dekretu-lei ne’e iha kedas dezde 2003 bele halo ona revizaun tanba kondisaun iha Timor seidauk di’ak no mínimu iha motorizada de’it,” Deputada Maria Angélica Rangel, informa liuhosi plenária, tersa ne’e.  

Nia afirma, se Governu hanoin ida-ne’e di’ak atu labele hamosu dezastre ba labarik sira entaun Governu tenke kria kondisaun atu nune’e labarik sira uza transporte ne’ebé indika hosi eskola.

“Se dehan lei ida atu halo hodi bandu tula labarik sira ho idade tinan neen (6), ha’u hanoin Timor-Leste seidauk iha kondisaun atu to’o iha-ne’ebá,” Deputada Bankada FRETILIN ne’e fó hanoin.  

Entretantu, Deputadu bankada Partidu Libertasaun Populár (PLP), Abel Pires da Silva, preokupa kona-ba polísia atu implementa lei kona-ba movimentu transporte públiku.

“Ha’u rona katak iha planu atu bandu inan-aman sira tula oan ho motorizada, ne’e ha’u hanoin realidade povu Timor ne’e ho kondisaun ekonomia sosa motorizada de’it, se ita bandu tula sira-nia oan ne’e sei hamosu problema barak liután,” nia dehan.

Deputadu PLP ne’e husu polísia pasa-revista de’it ba ema sira-ne’ebé la uza kapasete.

Purtantu, Deputadu Bankada Congresso Nacional de Reconstrução de Timorense (CNRT), Domingos de Carvalho, preokupa ho kestaun ida-ne’e.

“Ha’u prokupa kona-ba tula oan ho motorizada selu multa ne’e laloos. Kuandu hela-fatin ne’ebé dook hosi sentru saúde no klínika sira entaun bele tula oan ho motorizada,” nia dehan.

Bazea ba Dekretu-Lei númeru 6/2003, 3 abríl kona-ba Kódigu Estrada nian, iha sesaun XIII, artigu 85 (tula pasajeiru) númeru 1, hateten labele tula pasajeiru sira-ne’ebé seidauk halo tinan hitu (7) iha motosiklu no siklumotor, maibé bele tula pasajeiru sira-ne’e wainhira iha tuur fatin ne’ebé la’ós atu tau de’it naha maibé bele sai mós hanesan ema-nia tuur-fatin.

Númeru 2 hosi artigu 85 ne’e hatutan, labele tula ema iha velosípede. Purtantu númeru 3 hosi artigu 85 ne’e dehan, ema-ne’ebé la halo tuir regra nu’udar hakerek tiha ona iha númeru hirak-ne’e sei selu multa osan dolár $6 to’o dolár $12.

Entretantu, tuir Rejimentu Parlamentu Nasionál katak, hamosu inisiativa atu halo alterasaun ba lei ruma entaun deputadu sira bele inísia ho forma projetu-lei no bele mós mai hosi parte ezekutivu sira ho forma proposta-alterasaun.

 Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here