Ilustrasaun ema tuir formasaun. Imajen/Espesiál

DILI17 agostu 2021 (TATOLI)—Diretór Sentru Treinamentu Vizaun Foinsa’e (CTVF), Francisco Cancio Matos Guterres, informa dadaun ne’e CTVF fó hela formasaun otelaria ba joven sira hodi kapasita no prepara joven sira ba futuru tuir matéria ne’ebé iha.

“Matéria ne’ebé formandu sira estuda mak housekeeping, restaurante, produsaun aihan, inklui front office, ne’e iha departamentu haat (4) ne’e mak sira aprende durante fulan 12 inklui hala’o estájiu (prátika) iha otél sira,” Francisco Cancio Matos Guterres, hateten ba Agência Tatoli, iha nia knaarfatin, Caicoli, Dili, tersa ne’e.

Matéria ne’ebé formandu sira aprende iha housekeeping nian mak oinsá prepara kama ba Very Importante Person (VIP) tuir estandar ne’ebé iha hanesan iha Hotel Novo Turismo no Timor Plaza.

Iha área restaurante nian, nia esplika, oinsá atu serve ema no oinsá prepara meza ida ba Very Important Person (VIP).

Ba produsaun aihan nian, partisipante sira sei aprende oinsá prepara hahan tuir estandar ne’ebé iha hanesan halo sopa, no hahan ne’ebé sira prepara tenke mós no di’ak bainhira fó ba bainaka sira.

Daudaun ne’e, formandu ne’ebé tuir formasaun iha área otelaria hamutuk na’in25 ne’ebé maihosi estudante no joven en jerál.

Iha tinan 2021 ne’e, formandu hamutuk na’in50 mak tuir formasaun iha CTVF ne’ebé formasaun ne’e hahú fali iha 19 agostu no formandu sira tur formasaun kona-bá otelaria no administrasaun nian.

“Aminia formasaun ba área administrasaun no otelaria hamutuk na’in50. Hosi númeru ne’e ba área administrasaun iha formandu 25 no otelaria iha na’in25. Daudaun ne’e, sira tuir hela formasaun,” nia informa.

Atividade formasaun ne’e la’o maibé kumpre hela regra prevensaun COVI-19 ne’ebé fó sai hosi Ministériu Saúde (MS) no Organizasaun Mundiál Saúde (OMS).

“Iha ami nia formasaun ne’e, ami nafatin kumpre protokolu hanesan fase liman beibeik, uza máskara no halo distansiamentu sosiál, ho nune’e bele prevene no kombate moras COVID19,” nia informa.

Sentru formasaun ne’e estabelese iha 2004 ne’ebé funda hosi Agência Internasionál ho naran Word Vision TimorLeste, ho objetivu oinsá prepara joven sira hodi entrega ba merkadu servisu iha rai laran no mós rai-li’ur.

“Área formasaun hanesan otelária sertifikadu I, II, no Administrasaun Sertifikadu I,” nia dehan.

Totál formandu ne’ebé tuir formasaun hosi tinan 2010 to’o 2020 hamutuk 750 ne’ebé kompostu hosi formandu otelária 375 no administrasaun 375. Hosi númeru ne’e, 425 mak hetan ona servisu iha Instituisaun Governu, Organizaun Naun Govermentál (NGO), inklui loke negósiu rasik.

Totál funsionáriu no formadór hamutuk na’in10 no hosi númeru ne’e, formadór mai hosi Lisensiatura ne’ebé akaba estuudu iha Universidade sira iha díli laran no formandu balun maihosi rai-li’ur.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here