Sekretáriu Tékniku Fundu Dezenvolvimentu Kapitál Umanu (ST-FDCH-sigla portugés) hala'o serimónia asinatura kontratu no entrega Bolsu Hakbiit ba bolseiru 480 atu asesu ba UNTL. Imajen Tatoli/Francisco Sony

DILI, 17 agostu 2021 (TATOLI)-Sekretariadu Tékniku Fundu Dezenvolvimentu Kapitál Umanu (ST-FDCH) hamutuk ho  Ministériu Ensinu Superiór, Siénsia no Kultura (MESSK), tersa ne’e, hala’o serimónia asina kontratu no entrega bolseiru 480  ne’ebé selesionadu ba Bolsa Hakbiit hosi FDCH atu hala’o estudu iha Universidade Nasionál Timor Lorosa’e (UNTL).

Bolseiru hamutuk 480 ne’e sei hala’o sira ninia estudu iha UNTL ho nivel estudu hahú husi Diploma III (D3) to’o Lisensiatura (S1) iha fakuldade sira hanesan Agrikultura, Enjeñaria, Edukasaun, Direitu, Ekonomia, Siénsia Sosiál no Filozofia.

Diretór Ezekutivu FDCH, Hermenegildo da Silva, iha nia diskursu, husu ba bolseiru sira atu foku ba estudu, nune’e, bele termina sira-nia estutu ho di’ak tuir kontratu ne’ebé estabelese hosi FDCH.

Nia esplika programa Bolsa Hakbiit ne’ebé FDCH ho MESSK entrega ba UNTL ne’e bazeia ba Lei FDCH nian ne’ebé aprova tiha diploma ministerial númeru 9/2021, 10 marsu, ne’ebé fó kompeténsia ba FDCH   forma ekipa tékniku, kompostu hosi ST-FDCH, Ministériu Edukasaun, Juventude no Desportu (MEJD) no Ministériu Solidariedade, Sosiál no Inkluzaun (MSSI) iha munisípiu sira, hodi halo inskrisaun ba kandidatu bolseiru sira ne’ebé atu asesu ba hala’o sira ninia estudu iha universidade privadu sira no públiku.

Programa Bolsa Habiit ne’ebé bolseiru 480 hetan ona atu hala’o estudu iha Universidade Nasionál Timor Lorosa’e ne’e FDCH halo iha kontratu rua ba estudante sira hanesan konta ida diretamente ba propinas no seluk fali kada fulan FDCH halo transferénsia osan montante $120,00 ba estudante sira ba nesesidade nian.

“Ida-ne’e oportunidade di’ak ba ita-boot sira, tenke haka’as-an estuda atu hetan valor ne’ebé di’ak, ida ne’e importante tebes, karik ita-boot sira la konsege amostra rezultadu ne’ebé di’ak ita-boot sira sei moe ba ita-boot sira-nia família, kolega no ba públiku tomak, ba estadu ne’ebé investe ona ba ita-boot sira,” Diretór Ezekutivu FDCH hateten.

Oportunidade ne’e, Reitór UNTL, João Soares Martins, agradese ba VIII Governu liuhosi MESSK ne’ebé ho inisiativa di’ak hodi fó bolsa estudu ba família kbiit-laek sira hodi asesu ba hala’o estudu iha banku ensinu superiór.

“Agradese ba VIII Governu, Ministériu Ensinu Superiór ba oportunidade no mós ba intensaun kria fundu hakbiit ne’ebé fó ba estudante sira mai hosi família sira ne’ebé kbiit ladún to’o, ida ne’e hakarak agradese tebe-tebes tanba ho inisiativa ne’e bele ajuda hakbiit família sira iha Timor laran tomak,” João Soares Martins hateten.

Reprezentante Bolseiru Leonito Marques da Silva, hato’o agradesimentu ba MESSK ho FDCH ne’ebé atribui ona bolsa ba sira hodi hala’o sira-nia estudu iha banku ensinu superiór.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here