Reprezentante nasional banko mundial, Bernard harbone. Imajen TATOLI/Egas Cristóvão

DILI, 17 agostu 2021 (TATOLI)—Reprezentante Nasionál Banku Mundiál, Bernard Harbone, hasoru malu ho Primeiru-Ministru (PM), Taur Matan Ruak , hodi informa kona-ba apoia ne’ebé oferese ba Timor-Leste iha ámbitu kombate COVID-19.

“Banku mundiál apoia Timor-Leste iha área oioin, tanba ne’e apoia millaun $5 hodi kombate COVID-19. Ami apoia projetu iha área edukasaun, saúde no infraestrutura, inklui foka ba turizmu no diversifikasaun ekonómika tanba iha preokupasaun katak tinan 10 fundu petróleu menus, entaun iha projetu balun mak hadi’a ekonomia,” Bernard Harbone informa iha Rezidénsia ofisiál PM, Farol, tersa ne’e.

Investimentu hosi Banku Mundiál maka iha área bee no saneamentu iha Dili no Baucau, ne’ebé partisipa hamutuk ho Banku Dezenvolvimentu Aziátiku (ADB, sigla inglés).

“Iha aspeitu ne’e, Banku Mundiál preokupa maka’as ho inundasaun ne’ebé akontese iha rai-laran no programa ne’e hodi apoia bee no saneamentu hodi bele fó solusaun ba preokupasaun populasaun,” nia akresenta.

Biban ne’e, Reprezentante Banku Mundiál aprezenta ba PM kona-ba programa ne’ebé planeia ona atu implementa iha Timor-Leste.

“Programa prinsipál mak luta kontra COVID-19, sente surpreza tanba Timor-Leste atinje rezultadu di’ak luta kontra pandemia no satisfeitu tanba investe maka’as iha vasinasaun ba populasaun Timor-Leste tanba vasina konsidera instrumentu fundamentál atu kombate vírus,” nia hatutan.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here