Diretór Administrasaun Rekursu Umanu munisípiu Baucau, João Bosco Ximenes. Imajen TATOLI/Natalino Belo

BAUCAU, 17 agostu 2021 (TATOLI)–Diretór Administrasaun Rekursu Umanu Baucau, João Bosco Ximenes, hateten, parte diresaun halo planu orsamentu hodi prevee iha tinan oin ba rekrutamentu funsionáriu,  nune’e bele responde serbisu diresaun sira ne’ebé estabelese ona iha rejiaun ne’e.

“Ami-nia planu iha tinan fiskál 2022 sei rekruta funsionáriu 130 ba diresaun hotu ne’ebé estabelesidu iha munisípiu Baucau, planu haruka ba nasionál maibé konforme Parlamentu Nasionál aprova maka tinan oin ita sei rekruta,” Diretór Rekursu Umanu hateten iha Sentru Konvensaun Baucau (CCB, sigla portugés) tersa ne’e.

Daudaun ne’e funsionáriu iha diresaun servisu munisipál Baucau limitadu tebes, nune’e planu sei implementa tuir planu asaun anuál tinan 2022 hodi dezenvolve rai Baucau ba oin.

“Hau hanoin faze ba faze, bainhira iha diresaun, sira presiza rekursu umanu, tanba ne’e ita sei rekruta bazeia ba orsamentu,” João akresenta.

Tuir Diretór, kritéria kada sesaun ida tenki iha funsionáriu neen ba kraik no departamentu ida presiza na’in-30 ba kraik, maibé realidade iha Baucau, diresaun ida foin mak iha funsionáriu tolu, tanba ne’e presiza rekruta.

Iha fatin hanesan, Diretór Obra Públika Baucau, Pedro Alexandre Guterres Pereira, hateten, kuaze tinan barak ona diresaun presiza funsionáriu, tanba daudaun pesoál tékniku ba infraestrutura limitadu tebes.

Tanba ne’e, parte diresaun hato’o pedidu ba Prezidente Autoridade Munisípiu (PAM) Baucau atu aumenta funsionáriu neen, kompostu hosi supervisór rua, peskiza dadus estrada rua no tékniku ba dezeñu rua, tanba ne’e loke vaga.

Diretór Obra Públika Baucau, Pedro Alexandre Guterres Pereira. Imajen TATOLI/Natalino Belo

“Kuaze kandidatu 60 resin mak submete dokumentu, ne’ebé ba vaga tolu hanesan supervisor, peskiza dadus no tékniku ba dezeñu iha ema 46 mak kompete,” nia informa.

Bazeia ba diploma ministeriál númeru 48/2016 servisu obras públika munisipál, iha departamentu haat hanesan ekipamentu koletivu, planeamentu, reabilitasaun edifísiu no transporte.

Tuir Diretór, departementu haat ne’ebé eziste, daudaun seidauk sufisiente tanba kuantidade projetu aumenta ba bebeik, nune’e presiza aumenta ema neen bainhira iha rekrutamentu hodi bele prenxe estrutura.

Diresaun Admistrasaun Baucau ohin realiza ezame ba kandidatu funsionáriu kontratadu ba Servisu Água no Saneamentu (SAS) Baucau no Obra Públika, bazeia ba kompeténsia ne’ebé atribui liuhosi dekretu Lei númeru 3/2016 kona-ba desentralizasaun munisipál.

Enkuantu, iha Baucau iha servisu diresaun hamutuk 20 resin, kompostu hosi agrikultura, SAS, obras públika, protesaun sivil dezastre naturál, solidaridade sosiál, merkadoria turizmu, planeamentu, planu dezenvolvementu integradu munisipál, aprovizionamentu, lojístika, patrimóniu no seluk tan.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here