Xefe Kaza Sivil Prezidénsia Repúblika, Francisco Maria de Vansconcelos halo diálogu iha Institutu Boaventura Timor-Leste, iha salaun instututu, Luak, Same, segunda (16/08). Imajan TATOLI/Florêncio Miranda Ximenes

MANUFAHI, 16 agostu 2021 (TATOLI)–Xefe Kaza Sivil Prezidénsia Repúblika, Francisco Maria de Vansconcelos, hateten, Institutu Boaventura Timor-Leste (IBTL) iha Manufahi tenke sai sentru peskiza no pensamentu.

“Ha’u hakarak hateten ba ita-boot sira, institutu ne’e tenke sai sentru exelente peskiza no pensamentu, leitura tenke halo barak, iha biblioteka tenki lee tanba sivilizasaun ida para kuandu ema para lee,” Xefe Kaza Sivil hateten bainhira vizita IBTL, iha Luak, Same, segunda ne’e.

Nia konsidera, importante ba institutu aprendizajen ida atu hanoin uluk peskiza.

“Ita presiza hanoin atu serví sosiedade, labele hanoin serví sosiedade ne’e ema bolu de’it ba halo servisu sosiál, tanba ita ba servisu ho komunidade maka sai laboratóriu ba ita atu halo peskiza sientífika,” nia fó hanoin.

Ba nia, harii universidade tenke mai ho inisiativa no kreatividade atu la hahoris ema matenek de’it, maibé hahoris mós ema ne’ebé iha matenek no iha kreatividade.

“Institutu la prodús mákina, la prodús komputadór, la prodús bisikleta no karreta, maibé ita prodús ema sira ne’ebé hanoin atu halo komputadór, karreta no seluk, ne’ebé liga ba indústria. Institutu mós tenke sai hanesan sentru atu halo transformasaun, tanba la’ós hanorin ema sai matenek de’it,  maibé tenke prepara ema iha integridade,” Francisco subliña.

Tanba ne’e, nia iha espetativa IBTL bele sai hanesan ezemplu hamosu inisiativa atu kontribui ba dezenvolvimentu Timor-Leste.

Nune’e, Reprezentante Prezidente Repúblika ne’e husu dosente sira atu banati tuir ezemplu veteranu no antigu kombatente nia dedikasaun ba Estadu iha istória luta ba ukun rasik-an.

“Uluk, sira fó-an ba mate atu ita hetan liberdade, maibé agora ita presiza liberta povu tanba ho ita-nia matenek no dedikasaun  servisu ba povu,” nia tenik.

IBTL harii atu kontribui ba libertasaun povu

Iha biban hanesan, Vise Segundu Reitór ba Asuntu Administrasaun no Finansa IBTL, Hélmio Pereira, esplika, instituisaun ne’e harii hosi veteranu no antigu kombatente libertasaun nasionál na’in-17, hosi rejiaun III no IV, hanesan kompromisu atu kontribui ba libertasaun povu liuhosi área edukasaun hafoin libertasaun pátria.

Planu inisiál mak atu sai hanesan universidade ida, maibé tanba la kumpre rekizitu balun hosi Ministériu Ensinu Superior, Siénsia no Kultura (MESSK) maka oras ne’e funsiona de’it hanesan Institutu.

IBTL iha fakuldade haat  hanesan Ekonomia ho departamentu Jestaun, fakuldade Téknika ho departamentu Konstrusaun Sivíl no Informátika, fakuldade Saúde iha departamentu Saúde Públika no Enfermajen no fakuldade Agrikultura ho dapartamentu Agronomia.

“Hosi fakuldade haat ne’ebe iha, fakuldade rua de’it maka prenxe rekezitu no iha lisensa operasionál hosi Ministériu Ensinu Superiór, Siénsia no Kultura, hanesan fakuldade Ekonomia Téknika, maibé to’o tinan 2022, parte ministériu sei halo fali avaliasaun ba fakuldade rua ne’e,” nia akresenta.

Institutu no nia fundadór sira, liuhosi Fundasaun Leolaku Manufahi Riak (Fundasaun LELAMAR), kontinua esforsu prenxe rekizitu atu transforma Institutu ne’e ba universidade, ho kooperasaun ho veteranu Austrália no Nova Zelándia, ne’ebé apoiu hadi’a no harii tan sala laboratóriu ba fakuldade Saúde no Agrikultura.

Aleinde ne’e, institutu ne’e disponibiliza mós kursu inglés ba dosente no estudante sira.

IBTL iha dosente hamutuk 35 no totál estudante hamutuk 237, ne’ebé estudante 145 mak ativu, ho estudante barak hosi departamentu Enfermajen ho númeru estudante hamutuk 45.

Entretantu, Vise Reitór Asuntu Estudantil, Amorim da Costa Sarmento, dehan, Institutu kontinua lamenta ho falta númeru dosente no espera Reprezentante Prezidente Repúblika bele hato’o ba ministériu kompetente no doadór balun  hodi hadi’a liután kondisaun.

“Ita-nia Prezidente Repúblika Francisco Guterres ‘Lú Olo’ hanesan Konselleiru dahuluk hosi Institutu Boaventura Timor-Leste,” nia afirma.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here