Governu japaun simbolikamente entrega vasina AstraZeneca ba Governu Timor-Leste , iha resintu MNEK, Praia dos Coqueiros, segunda, (16/08). Imajen TATOLI/Egas Cristóvão

DILI, 16 agostu 2021 (TATOLI)–Timor-Leste ofisialmente simu ona vasina ho tipu AstraZeneca hamutuk doze 168.000 hosi Governu Japaun, ne’ebé entrega simbolikamente hosi Embaixadór Japaun iha Timor-Leste, Masami Kinefuchi, ba Primeiru-Ministru (PM), Taur Matan Ruak.

Iha biban ne’e, PM agradese ba entidade ne’ebé ho esforsu ajuda lori vasina tama mai Timor-Leste.

“Lori ha’u-nia naran rasik no povu, agradese ba esforsu tomak Embaixadór Japaun no Primeiru-Ministru Japaun, ba jenorozidade ne’ebé kontribui atu salva vida iha Timór, agradese espesiál ba Organizasaun Mundiál Saúde no United Nations Children’s Fund (UNICEF) ne’ebé halo esforsu ho difikuldade boot, maibé konsege lori vasina ne’e to’o mai Timór,” Xefe Governu hateten iha ámbitu seremónia entrega vasina hosi Governu Japaun mai Timor-Leste, iha resintu Ministériu Negósiu Estranjeiru no Kooperasaun (MNEK), segunda ne’e.

Governu japaun simbolikamente entrega vasina AstraZeneca ba Governu Timor-Leste , iha resintu MNEK, Praia dos Coqueiros, segunda, (16/08). Imajen TATOLI/Egas Cristóvão

Seremónia entrega ne’e partisipa hosi Primeiru-Ministru (PM), Taur Matan Ruak no membru Governu relevante, Embaixadór Japaun iha Timor-Leste, Masami Kinefuchi, reprezentante  UNICEF no reprezentante Organizasaun Mundiál Saúde (OMS).

Tuir PM ho apoiu sira ne’e, iha serteza katak to’o tinan ne’e nia rohan, la’ós 100% maibé pelu menus atinje 80% populasaun mak hetan vasina, nune’e bele ajuda Timór filafali ba normalidade.

Xefe Governu akompaña, populasaun millaun 200 resin iha mundu mak infetadu ona COVID-19 no millaun 4 resin mak mate ona, ne’ebé Timor-Leste la ses hosi situasaun pandemia, hahú marsu 2020 to’o ohin, rejista ona kazu infetadu hamutuk 12.000 resin, kazu ativu 2.000, óbitu 33 no finalmente variante delta komesa espalla iha Timor-Leste.

Timor-Leste hetan apoiu hosi organizasaun internasionál no nasaun viziñu hodi ajuda enfrenta situasaun COVID-19.

Primeiru-Ministru, Taur Matan Ruak. Imajen TATOLI/Egas Cristóvão

To’o segunda ne’e Timor-Leste simu ona vasina hamutuk doze 982.380, kompostu hosi COVAX 1.800, Nova Zelándia 24.000, Xina 100.000, Austrália 577.580, Portugál 12.000, no Japaun 160.000.

Hosi númeru ne’e Timór konsege vasina sidadaun iha Timór laran tomak ba doze dahuluk 45,2% no doze daruak 16,9%.

Vasinasaun iha Dili, ba doze dahuluk atinje 70,7% no doze daruak 49,1%, tuir fali mak munisípiu Covalima 59,9% no Viqueque 54,3%.

Nune’e, Xefe Ezekutivu  agradese ba profisionál saúde, liuliu iha Dili, ne’ebé halo servisu di’ak hodi fó ezemplu ba munisípiu hotu.

“Forma di’ak atu evita COVID-19 alastra mak avansa ho vasina,” nia subliña.

Japaun espera bele kontribui hakma’an Timor-Leste kombate COVID-19

Iha sorin seluk, Embaixadór Japaun iha Timor-Leste, Masami Kinefuchi, hateten, ida-ne’e nu’udar parte ida hosi promesa ba Primeiru-Ministru Japaun ne’ebé hato’o iha fulan-juñu liubá, bainhira konvoka reuniaun vasina COVAX hamutuk ho GAVI, iha Tóquio

“Ha’u espera fornesimentu adisionál vasina hosi Japaun ne’e sei kontribui halo kama’an situasaun pandemia iha país ida-ne’e,” Embaixadór tenik.

Embaixadór Japaun iha Timor-Leste, Masami Kinefuchi. Imajen TATOLI/Egas Cristóvão

Tuir Diplomata ne’e, dezafiu ne’ebé hasoru mak difikuldade atu lori vasina mai Timor-Leste tanba kestaun konetividade, maibé finalmente COVAX konkorda aranja voo ida uza doasaun boot Japaun ba fasilidade ne’e.

“Agradese tebes ba COVAX, UNICEF no Governu Timor-Leste, ba sira hotu nia apoia hodi realiza serimónia entrega vasina ne’e. Ita hotu kontinua kombate pandemia ne’e hamutuk.  Iha liafuan ida hateten katak ‘hamutuk ita forte, fahe-malu ita monu’,” nia subliña.

Diplomata ne’e louva Governu Timor-Leste adota daudaun meiu prevensaun oioin no povu tomak ho respeitu no pasiénsia halo tuir restrisaun ne’ebé impon hosi Governu, tanba ne’e to’o ohin loron ein jerál, Timor-Leste ninia istória COVID-19 di’ak liu kompara ho nasaun seluk.

Iha parte seluk, nia konsidera presiza esforsu liután hodi ultrapasa pandemia ne’e no normaliza ekonomia, nune’e lori fila hikas nasaun ne’e ba dalan dezenvolvimentu.

Durante tinan ida ikus ne’e, Japaun finansia ona projetu oin-oin liuhosi JICA, UNICEF, PNU, Banku Dezenvolvimentu Asiátiku (ADB, sigla inglés) no Banku Mandiri ho montante totál milliaun $16 resin, ba fornesimentu ekipamentu médiku inklui ambulánsia, hadi’a situasaun sanitária, oferese Cesta Bázika no lansamentu dahuluk liña direta ba saúde mentál ba hirak ne’ebé afetadu, no estabelese kadeia-malirin ba vasina.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here