Sentru Saúde Komunitária Komandante Martinho da Silva Guisarudu, postu adminsitrativu Hatulia B, munisípiu Ermera. Imajen Tatoli/Felicidade Ximenes.

DILI, 16 agostu 2021 (TATOLI)—Sentru Saúde Komunitária Komandante Martinho da Silva Guisarudu, postu adminsitrativu Hatulia B, munisípiu Ermera presija pesoál saúde permanente atu bele halo atendimentu ba komunidade ho di’ak no efetivu liu.

Xefe sentru saúde komunitária Guisarudu, Maria Magdalena Mali husu ne’e, tanba to’o oras-ne’e iha  pesoál saúde na’in 12, kompostu hosi médiku na’in-haat, parteira na’in-haat  no  enfermeiru na’in-haat, maibé ho estatutu kontratadu hotu.

Notísia relevante:Pesoál saúde na’in-lima iha Guisarudo pozitivu COVID-19

“Rekursu umanu mak sai difikuldade boot, tanba pesoál saúde sira mesak kontratadu no sira mós halo rotasaun. Tanba ne’e, husu Ministériu Saúde atu koloka pesoál saúde permanente,” Maria Magdalena  Mali, hateten ba jornalista Agência Tatoli via telefónika, segunda ne’e.

Baibain pesoál saúde-sira halo rotasaun ba postu saúde iha suku lima mak hanesan, suku Lisapat iha postu foun maibé seidauk inaugura, suku Mau-ubo, Urahou, Fatubessi no Fatubolu.

Postu saúde haat ne’e funsiona hela, maibé  laiha médiku  no parteira, nune’e médiku-sira iha sentru mak ba halo atendimentu  durante loron rua, no loron tolu tenke mai fali sentru saúde.

Iha fulan jullu, sentru saúde Guisarudu rejista pasiente ne’ebé mai konsulta iha ambulatóriu  hamutuk 3815.

Hosi númeru ne’e, moras Infesaun Respiratóriu Alta (IRA) mak aas, no maioria labarik hahú hosi tinan tolu mai karaik, tanba iha Hatulia durante ema halo estrada fó impaktu makás hosi rai-rahun.

Antes ne’e, Vise-Ministru Saúde, Bonifácio ‘Maucoli’ dos Reis, informa Minsitériu Saúde halo hela rekrutamentu ba internatu no  sei apoia tan rekursu umanu iha sentru saúde Guisarudu, nune’e  fó nafatin  atendimentu  ba komunidade.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here