Prezidente Parlamentu Nasionál (PNN), Deputadu Aniceto Longuinhos Guterres Lopes, fó pose ba Prezidente Komisaun Nasionál Eleisaun (CNE sígla portugés), José Agostinho da Costa Belo ho Komisáriu-sira, iha sala plenária PN, segunda (16/08). Imajen Tatoli/Egas Cristovão.

DILI, 16 agostu 2021 (TATOLI)—Prezidente Parlamentu Nasionál (PNN), Deputadu Aniceto Longuinhos Guterres Lopes, fó pose ba Prezidente Komisaun Nasionál Eleisaun (CNE sígla portugés), José Agostinho da Costa Belo no Komisáriu-sira, segunda ne’e.

“Prezidente CNE atuál hakotu mandatu no ohin mós ha’u fó pose ba Prezidente CNE no Komisáriu sira. Iha sesaun pose ohin, serve mós primeira reuniaun CNE tuir lei haruka,” Aniceto Longuinhos Guterres Lopes, ko’alia iha plenária.

Notísia relevante:José Belo eleitu sai Prezidente CNE

Xefe Lejisladór ne’e hateten, iha demokrasia reprezentativa, eleisaun nu’udár momentu opurtunu ba sidadaun-sira atu hatudu sira-nia espetativa, opsaun polítika no depozita konfiansa ba sé mak lidera Estadu no asume podér polítiku, no sé mak sei sai povu nia reprezentante loloos.

Tanba ne’e, nia dehan, bainhira povu lakon liberdade tanba osan ka promesa falsu ka falsifikasaun iha prosesu eleitorál no povu laiha koñesimentu loloos ba sé mak nia atu espresa nia opsaun polítika, Estadu moris iha demokrasia falsu no eleisaun rezultadu autokrata, nune’e Estadu liuhosi órgaun kompetente-sira tenke tetu no deside alternativa viável no justa.

PPN fó pose ba José Agostinho da Costa Belo hanesan Prezidente CNE ba mandatu tinan lima, hamutuk ho Komisáriu sira mak hanesan Alcino de Araújo Báris, Olávio da Costa Monteiro de Almeida, Carlito Martins, Antonino Gonçalves, Domingos Barreto no Odete Maria Belo.

Antes ne’e, ema na’in-tolu ne’ebé Parlamentu Nasionál nomeia sai komisáriu mak hanesan Alcino de Araújo Báris, Odete Maria Belo no José Agostinho da Costa Belo.

Lista membru ne’ebé dezigna ona hosi órgaun kompetente ba CNE mak hanesan Prezidente Repúblika nomeia ona Olávio da Costa Monteiro de Almeida no Detaviana Madalena Guterres Freitas, nu’udár membru suplente. Ne’e previstu iha dekretu Prezidente Repúblika númeru 41/2021, 1 jullu.

Carlito Martins nomeadu hosi Governu nu’udár membru efetivu no Elvino Bonaparte do Rêgo nu’udár membru suplente (karta ofisiál haruka ba PN iha loron 9 jullu 2021).

Majistradu judisiál, Antonino Gonçalves eleitu nu’udár membru efetivu no João Ribeiro nu’udár suplente, ne’e dezigna hosi Tribunál Rekursu, ne’ebé haruka iha loron 30 juñu 2021.

Majistradu hosi Ministériu Públiku, Domingos Barreto, eleitu nu’udár membru efetivu no Napolião Soares da Silva nu’udár membru suplente (karta ofisiál haruka iha loron 5 jullu 2021).

Jornalista: Evaristo Soares Martins

Editór: Cipriano Colo

HAKEREK NO HATÁN

Please enter your comment!
Please enter your name here