Asistente Jestór Loja Creative Furak, Yaty Zaka. Imajen TATOLI/Natalino Costa

DILI, 16 agostu 2021 (TATOLI)—Loja Creative Furak, Lda rejeita informasaun ne’ebé espalla ba públiku loron hirak liubá, katak fa’an foos a’at ba konsumidór to’o munisípiu.

“Kona-ba notísia ne’ebé fó sai katak ami fa’an foos a’at, iha biban ne’e ha’u konfirma fali ba ita-bo’ot sira katak foos ne’ebé daudaun ami fa’an, la’ós foos a’at ou laos foos kontaminadu, maibé foos di’ak,” Asistente Jestór Loja Cretive, Yaty Zaka, hateten, iha ninia knaar fatin, Bidau Akaderu-hun,  segunda ne’e.

Biban ne’e, nia mós konfirma katak loja seidauk fa’an foos a’at ba munisípiu sira.

“Ha’u hakarak klarifika, ami seidauk fa’an foos a’at ba munisípiu sira, foos a’at sempre iha tanba  foin lalais  foos tama, iha saku balun nakles, entaun ami tenke sortir fali hodi enxe fali ba karon foun no momentu ne’e tau ketak tiha kedan, ida-ne’ebé maka di’ak ami presiza tau filafali ba saku no suku fali,” Asistente Jestór loja akresenta.

Notísia relevante: TANE simu reklamasaun foos a’at hosi konsumidór

Foos ne’ebé tula hosi ró mai parte loja Creative sei klaim hodi husu ba parte asuransi iha Indonézia atu selu.

“Karik ami fa’an foos a’at no bainhira ita boot sira hetan, bele lori amostra hodi reklama mai ami no notísia ne’ebé fó sai, ha’u sente la loos tanba daudaun ne’e iha persaingan bisnis barak no bele hamonu malu ho meiu ida-ne’e,” nia hatutan.

Nia dehan, karik Autoridade Inspesaun Fiskalizasaun Atividade Ekonómika, Sanitária no Alimentar (AIFAESA) deteta loja Creative Furak komete irregularidade, maka parte loja prontu responsabiliza.

Iha sorin seluk, Diretór Operasaun AIFAESA, Gabriel da Costa, hateten, hafoin sesta liubá bainhira simu informasaun, tun ba kedan hodi husu informasaun ba iha loja Creative.

“Loja na’in rekoñese katak foos iha a’at duni tanba kona tasi-been, maibé sira informa ona ba AIFAESA katak laiha intensaun atu fa’an ba merkadu,” nia konta tuir.

Tuir Diretór Operasionál, daudaun parte loje Creative tau de’it iha li’ur no konta hodi informa ba parte asuransi atubele troka.

“Ami informa, ita-bo’ot sira tenke konta foos a’at atu nune’e parte AIFAESA bele hatene kuantidade foos a’at iha loja Creative, atu nune’e ami bele serbisu hamutuk parte loja hodi halo destruisaun no labele fó konsumu ba ita-nia komunidade,” nia tenik.

Enkuantu, foos hamutuk tonelada 7.500 maka antes ne’e loja Creative Furak importa hosi Indonézia via marítima.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here