Kadeira ne’ebé prodús hosi Institutu Bambú atu oferese ba UNTL, iha sentru produsaun Tibar, segunda (16/08). Imajen TATOLI/Antónia Gusmão

DILI, 16 agostu 2021 (TATOLI)–Institutu Peskiza, Dezenvolvimentu, Formasaun no Promosaun Bambú, Institutu Públiku (IPDFP, I.P) selebra ona akordu ida ho Universidade Nasionál Timor Lorosa’e (UNTL) hodi oferese kadeira hamutuk 3.000 ba universidade.

“Institutu Bambú foin lalais ne’e selebra ona akordu ida ho Diresaun Aprovizionamentu UNTL kona-ba institutu prepara kadeira ba estudante sira tanba harii edifísiu foun no presiza kadeira 3.000 iha tinan ne’e, hafoin asina kontratu ne’e, iha faze dahuluk ami halo kadeira 1.800 hafoin mak kontinua,” Diretór Ezekutivu IPDFP, I.P António dos Santos de Matos, hateten, ba Agência TATOLI iha ninia knaar fatin, Tibar, segunda ne’e.

Nia hatutan, daudaun ne’e karpentériu sira prodús ona kadeira 500 no atu iha ona prosesu lori ba universidade, tanba hafoin asina kontratu, husu atu lori ona balun.

Hosi serbisu hamutuk ne’e, Institutu Bambú hetan osan $1.800-resin, ho predu kada kadeira $60.

“UNTL satizfeitu tanba Bambú iha ida de’it, ne’ebé sira la presiza halo fali konkursu hanesan ajudikasaun de’it mai,” nia akresenta.

Tinan oin, UNTL sei husu tan kadeira 4.000, maibé haree ba fasilidade, maka sei prodús uluk montante ne’ebé iha ona kontratu.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here