Vise Primeiru-Ministru no Ministru Planu no Ordenamentu, José Maria dos Reis, entrega produtu Cesta Bázika simbolikamente ba komunidade. Imajen Tatoli/Antónia Gusmão

DILI, 16 agostu 2021 (TATOLI)—Forum Organizasaun Naun Governamentál Timor-Leste (FONGTIL),  segunda ne’e, halo lansamentu relatóriu monitorizasaun programa Cesta Bázika nian ne’ebé hala’o ona ba munisípiu 12 inklui Rejiaun Administrativa Espesiál Oé-Cusse Ambeno (RAEOA).

Iha relatóriu ne’e, FONGTIL nota katak implementasaun programa Cesta Bázika ne’e  mosu fallansu balun, tanba ne’e, FONGTIL rekomenda ba Governu atu hadi’a fallansu sira-ne’e, karik programa ne’e atu kontinua iha futuru.

Diretór Ezekutivu FONGTIL Daniel Santos do Carmo, esplika objetivu FONGTIL hola inisiativa hala’o monitorizasaun ba programa Cesta Bázika  atu sukat kualidade transparénsia no kontabilidade Governu nian ba osan povu nian.

Husu responsabilidade Governu nian ba despeza públiku relata ho programa Cesta Bázika (bote ai-han) atu halo kontrolu kualidade ba planu rekuperasaun ekonómika liuhosi aprezentasaun efetivu negativu no pozitivu hosi programa Cesta Bázika ba planu rekuperasaun ekonómika ba tempu badak, médiu no tempu naruk inklui nia efeitu ba sustentabilidade ekonómika.

“Monitorizasaun ne’ebé ami-nia membru sira hala’o ba munisípiu 12 inklui RAEOA. Importante hosi relatóriu ne’e fó benefisia ba povu agrikultór no mós ba benefisiáriu sira, maibé tuir ami-nia monitorizasaun ne’e sei iha fallansu balu bainhira implementa Cesta Bázika entaun liuhosi lansamentu relatóriu ne’e oinsá ajuda Governu karik programa ne’e iha kontinuasaun bele hadi’a nia mekanizmu sira,” Daniel Santos do Carmo hateten ba jornalista-sira iha Salaun FONGTIL, Caicoli, Dili, segunda ne’e.

Durante membru FONGTIL halo monitorizasaun iha terrenu nota katak implementasaun programa Cesta Bázika iha terrenu hamosu númeru reklamante barak tanba entre ministériu implementadór sira hanesan, Ministériu Koordenadór Asuntu Ekonómiku (MCAE sigla-portugés), Ministériu Turizmu Komérsiu no Indústria (MTCI), Sekretáriu Estadu Kooperativa (SEKoop) no Ministériu Agrikultór no Peska (MAP) ladún iha liña koordenasaun kona-ba lista benefisiáriu.

“Loloos ne’e ministériu implementadór sira tenke iha kooperasaun Ministériu Administrasaun Estatál (MAE) hodi hetan dadus ne’ebé rigór, maibé Ministériu implementadór sira uza mak dadus anteriór nian kona-ba subsídiu $200 entaun to’o agora barak mak seidauk simu Cesta Bázika,” nia  hateten.

Problema seluk ne’ebé membru FONGTIL nota durante halo monitorizasaun mak folin sasán ka produtu Cesta Bázika nian folin sa’e liu 10% kompara folin sasán ne’ebé baibain fa’an iha loja sira, nune’e produtu sira ne’ebé fahe loloos ema ida hetan sasán nia folin to’o $50,00 maibé iha implementasaun ne’e la to’o alvu.

Hosi folin amostra sasán ne’ebé FONGTIL  foti iha loja sira hanesan, pastadente folin $0,50 maibé kompañia hasa’e fali folin to’o $0.75 entaun kompañia sira manan osan liu ona 10%.

Adjuntu Komisáriu Komisaun Anti Korrupsaun (CAC), Luis Oliveira Sampaio hateten, durante implementasaun programa Cesta Bázika CAC konsege identifika problema barak hanesan kualidade produtu, folin produtu no transparénsia ba implementasaun entaun hosi ne’e CAC konsege hapara kompañia haat hosi Munisípiu tolu ne’ebé komete erru boot.

“Kompañia haat ne’ebé komete erru ne’e ami konsege salva osan hamutuk $66.000, no kompañia tolu refere ida hosi Munisípiu Lautem, Dili rua, Liquiça ida,” nia dehan

CAC husu ba Governu, karik kontinuidade programa Cesta Bázika ka Governu nia programa saida de’it atu implementa tenke inkilina hotu servisu CAC nian, nune’e iha preparasaun ne’ebé di’ak atu hapara manipulasaun ne’ebé mosu.

Koordenadór Programa Cesta Bázika, Fernando de Araújo, agradese barak ba FONGTIL ne’ebé ajuda ona sira halo monitorizasaun ba programa Governu nian liuliu ba programa Cesta Bázika nian.

“Ami rekoñese katak iha problema durante implementasaun programa Cesta Bázika, tanba ne’e presiza tebes servisu hanesan FONGTIL halo nune’e bele ajuda Governu katak programa Cesta Bázika ne’e fó benefísiu duni ba ita-nia povu,” nia dehan.

Programa Cesta Bázika hahú iha fulan novembru 2020 no ensera iha fulan agostu 2021 nune’e hosi programa Cesta Bázika refere benefisia ona ema 1.454.246 iha Timor laran tomak no reklamante ne’ebé seidauk simu Cesta Bázika ne’e hamutuk 25.000.

Jornalista : Arminda Fonseca

Editór       : Francisco Simões

 

HAKEREK NO HATÁN

Please enter your comment!
Please enter your name here