Serimónia hatuur fatuk-inan ba konstrusaun futuru edifísiu no kampus foun Institutu Defeza Nasional Timor Leste (IDN-TL) iha área Hundolte, Aldeia Bandeira Hun, Suku Liurai, Munisípiu Aileu. Imajen/IDN-TL

DILI, 16 agostu 2021 (TATOLI)-Oitavu Governu Konstitusionál, domingu   (15/08), hatuur ona fatuk-inan  ba projetu boot futuru edifísiu no kampus foun Institutu Defeza Nasionál Timor Leste (IDN-TL) iha área Hundolte, Aldeia Bandeira Hun, Suku Liurai, Munisípiu Aileu.

Rai ne’ebé Governu instala ba Kampus IDN ne’e ho nia área luan ektaras 47 tuir dadus Diresaun Nasional Terras no Propriedade  (DNTP) Munisípiu Aileu nian.

Diretór IDN, Donaciano Costa Gomes “Pedro Klamar Fuik”, hato’o agradesimentu ba autoridade lokál, veteranu ho lider komunitáriu, espesiál ba povu Aileu tomak nia-laran luak, ne’ebé oferese ona rai ba Governu instala edifísiu kampu ba dame IDN iha rai klaran.

“IDN eskolla loron 15 agostu 2021, tanba konsidera nu’udar loron istóriku ba povu Timor-Leste, espesiál ba povu Aileu hodi hanoin hikas loron 15 agostu 1975, iha tinan 46 ba kotuk Komité Sentrál FRETELIN (CCF, sigla portugés) hamutuk ho eis Sekretáriu Rejionál nu’udar Aileu mós Veteranu Domingos do Santos deklara, Insurreisaun Armada no harii FALINTIL iha Aisirimou, Munisípiu Aileu hodi dezarma Forsa Portugés sira, inklui mós kontra Golpe ne’ebé lansa ona hosi Partidu UDT sira, ne’e istória ne’ebé presiza ita jerasaun foun sira aprende,” Donaciano Costa Gomes, “Pedro Klamar Fuik” hateten liuhosi komunikadu imprensa ne’ebé Agência Tatoli simu hosi Gabinete IDN iha Dili, segunda ne’e.

Antes memebru Governu sira hamutuk ho komunidade Aileu hakat ba faze hatuur fatuk-inan ba kampus IDN, halo uluk prosesu kulturál ne’ebé lia-na’in sira hosi uma lisan Hoholu, Rai Mansu, Aileu, halo tuir tradisaun kulturál hodi husu matak malirin no avó bei-ala sira no hasé matebian sira tanba ne’e antes mate barak hakoi iha fatin refere.

Hosi serimónia hatuur fatuk-inan ba kampus IDN ne’e ba oin IDN sei kompleta tan dokumentu balun hosi Ministériu Justisa, hafoin prevee orsamentu iha Orsamentu Estadu 2022 hodi kontinua ba prosesu konstrusaun.

“Agradese povu Aileu oan sira, ne’ebé simu IDN ho laran luak hodi ofrese fatin harii futuru edifísiu no kampu IDN, Fatin ne’e, sei dezenvolve di’ak liu tan, hodi marka istória ba jerasaun futuru sira, no progresu dezenvolvimentu ne’ebé ita hakarak,” Pedro Klamar Fuik hateten.

Eis Komandante Komponente Naval esklarese katak Institutu Defeza Nacional (IDN) harii hosi dekretu lei númeru 10 de 26 agostu 2010, atu bele forma lideransa hotu-hotu ne’ebé mak iha hanoin estratéjiku no hatene halo planeamentu estratéjiku. Ida ne’e, hanoin ne’ebé mak Estadu iha atu bele sustenta independénsia ne’ebé mak konkista.

Pedro Klamar Fuik afirma, kampu ba dame ida ne’e sei dezenvolve hela ba jerasaun sira, tanba fatin ida refere marka tan istória no marka progresu ba dezenvolvimentu ida ne’ebé mak hotu-hotu hakarak.

Biban ne’e, prezidente Komisaun B Parlamentu Nasionál (PN), José Agostinho Siquera “Sumoxo”, dehan, loron 15 agostu ne’e importante tebes atu fó kontinuidade hodi fó omenajen ba eroi sira, inklui Aileu oan sira, ne’ebé mate iha loron 15 agostu, hahú Saudozu Nicolau Lobato to’o Nino Conis Santana ho ninia maluk sira ne’ebé mate hahú funu iha loron ida ne’e bolu naran insurreisaun Armada.

“Hanoin ba loron 15 agostu, tinan 46 ba kotuk, ohin loron, ita mai hamriik fali iha fatin ne’e ho siklu foun, dinámika foun, kriatividade ida ne’ebé ho hanoin ida de’it, atu kontinua obra sira ne’ebé ita-nia eroi sira husik,” Sumoxo hateten.

Nia agradese tebes ba Aileu oan sira hodi fó ona rai ho hanoin atu kontinua istória ne’ebé hahú iha loron ohin hateke ba kotuk karakter eroi sira diferente, maibé ho eventu refere fó valór ba sira-nia obra, ne’ebé ketak loos maibé ohin loron mós obra ida ne’ebé kontinua sira-nia obra hafoin tinan 46 Instituto Defeza Nasionál ligadu ba militár, defeza no seguransa maibé nia objetivu la’ós atu forma de’it militár, maibé atu forma mós polítiku sira atu aban bainrua dezenvolve rai-ida ne’e, hateke dook no hateke ba ema hot-hotu.

“IDN mai ho nia esperansa, fatuk dahuluk ne’e forte no hakmatek, hanesan fatuk ne’ebé tenke hada. Oinsá IDN bele hala’o ninia knaar bazeia ba vizaun ho misaun hodi dezenvolve futuru pensadór sira,” nia dehan.

Administradór Munisípiu Aileu, Abel da Conceição dehan, Aileu marka tan istória foun ida ba Timor laran tomak, aleinde harii sidade universitáriu, harii tan futuru instalasaun edifísiu kampu IDN.

“Loron lansamentu, ne’e importante tebes ba Aileu ona sira, tanba iha loron 15 agostu 1975, ita nia lider istóriku sira hamutuk ho Aileu ona balun agora sei hamutuk ho ita, hodi halo dezarmasaun ba forsa portugeza sira, nune’e onra boot ba ami Aileu oan sira hotu iha momentu ida ne’e, ho laran fuan tomak, ami entrega rai hamutuk ektare 47 tuir dadus Diresaun Nasional Terras Propriedade Munisípiu Aileu, hodi hari futuru instalasaun edifísiu no Kampus IDN,” Abel da Conceição hateten.

Jornalista   : Arminda Fonseca

Editór        : Francisco Simões

 

HAKEREK NO HATÁN

Please enter your comment!
Please enter your name here