Prezidente Departamentu Juventude Católika Arkquidioseze de Dili (DEJUCDIL), Pe. João Soares. Imajen TATOLI/Jogerjo Guterres.

DILI16 agostu 2021 (TATOLI)—Prezidente Departamentu Juventude Católika Arkquidioseze de Dili (DEJUCDIL), Pe. João Soares, informa aleinde sentru formasaun DEJUCDIL fó kursu kona-bá komputádor, lían inglês no portugês, realiza mós formasaun integrada ba joven sira hanesan formasaun umana no espirituál.

“Ami fó formasaun ne’e ho objetivu atu joven sira hatene no komprende sirania an. Bainhira tama iha ambiente ruma, sira nafatin lori sirania an hanesan ema,” Pe. João Soares hateten ba Agência Tatoli, iha nia knaar fatin, Katedrál Díli, segunda ne’e.

Formasaun umana ne’e, atu lori joven sira hodi komprende no buka atu deskobre no simu sirania an, hodi tama iha sosiedade tanba joven ida kuandu seidauk koñese no komprende ninia an ne’e, nia seidauk bele tama iha sosiedade nia klaran.

Nune’e mós, formasaun espirituál ne’e hodi fó tulun ba joven sira atu deskobre sirania an, nu’udar ema imajen Maromak nian ne’ebé sempre mantein nafatin komunikasaun permanente ho Na’i Maromak.

“Formasaun espírituál ne’e, hosi parte seluk ida mós hanesan tulun valór morál sira, hanesan tulun joven sira atu komprende buat di’ak bele halo maibé ba buat ne’ebé defisil iha hanoin hasai tiha. Ida-ne’e mak durante ne’e ami fó,” Pe. João Soares hateten.

Aleinde ne’e, nia informa, daudaun ne’e formasaun paradu hela maibé bainhira Dili livre ona hosi moras COVID19 mak sentru formasaun DEJUCDIL bele hahú fali atividade formasaun ba formandu sira.

Iha sentru ne’e rasik seida’uk iha planu hodi reativa formasaun tanba Governu ninia desizaun seida’uk loos. Ha’u lakohi halo terus joven sira. Bainhira iha desizaun loos ona no COVID19 ne’e la iha ona mak ami foin bele reativa formasaun ne’e,” nia dehan.

Sentru ne’e hahú hala’o atividade formasaun iha fulan janeiru maibé to’o marsu suspende tiha, tanbá Governu implementa serka sanitária no konfinamentu obrigátoriu. Daudaun ne’e, seida’uk planu atu reativa formasaun maibé bainhira atu reativa formasaun mak sei fó sai informasaun liuhosi pajina Dejucdil nian.

“Ami mós sei kontaktu direta ba númeru telefóne hosi formandu sira nian hodi fó informasaun, atu nune’e sira bele fila-fali mai tuir formasaun. Ami nafatin kumpre regra prevensaun COVID19,” nia dehan.

Totál formandu iha tinan 2021 ne’e hamutuk150 ne’ebé tuir formasaun iha área formasaun komputadór, lían inglés no portugés. Totál formandu ne’ebé tuir formasaun iha sentru Dejucdil, hosi estabelesimentu to’o agora hamutuk 7000-resin.

“Hosi númeru ne’e, iha 50% mak hetan ona servisu iha instituisaun Governu, Organizasaun Naun Govermentál (NGO) no balun sai artista ona,” nia informa.

Dadaun ne’e totál fungsionáriu no formadór hamutuk na’in11.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here