Prezidente Konsellu Administrasaun APORTIL, Flávio Cardoso Neves, entrega dokumentu balun ba ekipa investigadór hosi Komisaun Anti Korupsaun (CAC sígla portugés) relasiona ho prosesu aluga Ró Tranship II, iha fatin APORTIL, segunda (16/08). Imajen Tatoli/Francisco Sony.

DILI, 16 agostu 2021 (TATOLI)—Komisaun Anti-Korrupsaun (CAC, sígla portugés), ezekuta mandadu buska no apreensaun, hodi rekolla dokumentu no bolu Diretór Cabotage Nasionál  iha Autoridade Portuáriu Timor-Leste (APORTIL), ho inisiál  FCC, hodi halo identifikasaun durante oras 12, relasiona ho prosesu kontratu ró Tranship II.

Dokumentu importante sira ne’ebé CAC rekolla mak hanesan, pedidu operasaun, kontratu, prosesu aprovizionamentu oinsá ró ne’e mai TL, dokumentu pedidu pagamentu ho commitement payment voicer (CPV), inklui asegura komunikasaun ekipamentu serbisu, ne’ebé Diretór Cabotage Nasionál uza hanesan telephone no komputadór ida.

Notísia relevante:Kazu ró Tranship II, CAC hala’o mandadu buska no apreensaun ba APORTIL

“Sei armoniza fila-fali dokumentu relevante ho prosesu sai evidénsia atu asegura, tarde liu to’o aban sei submete ba Ministériu Públiku (MP) liuhosi prokuradór titular,” Pontu fokál, Euclides Madeira, hateten ba jornalista-sira iha edifísiu CAC, Faról, segunda ne’e.

Tuir prosesu normál, identifikasaun ba Diretór Cabotage nasionál depende ba progresu, bainhira  prosesu ne’e iha prova forte, maka sei aplika kedan detensaun durante oras 72, hafoin submete ba primeiru interrogatóriu iha Tribunál.

CAC sei husu autorizasaun hosi Tribunál, atu loke dokumentu-sira, hodi bele haree evidénsia, nune’e bele foti ba fasilitasaun prosesu tuir-mai.

Hatán kona-bá iha suspeitu balun tán mak envolve iha prosesu ne’e, Euclides Madeira labele fó-sai, maibé depende ba prosesu identifikasaun, bainhira identifika tán ema balun, maka tenke halo mós prosesu hanesan.

Parte CAC mós hetan informasaun katak, ró ne’e fila ona ba Indonézia iha sesta liu-bá, maibé  sei la fó impaktu ba prosesu investigasaun, tanba ró ne’e la’ós pertense ba Governu, maibé aluga, nune’e bainhira remata tenke fila-fali ba nia fatin.

CAC hala’o buska apreensaun, domisíliu no preende sasán tuir mandadu Tribunál Distritál Dili (TDD) ho númeru NUC  007/21.CAC TL, ne’ebé deskonfia Diretór Diresaun Cabotage komete krime abuzu podér  no partisipasaun ekonomia iha artigu 297,299 iha kódigu penál.

Buska ne’e hala’o iha edifísiu Cabotage iha portu Dili  iha  tuku 9:40 no iha tuku 11:00 otl kontinua halo buska aprensaun dokumentu iha edifísiu sentrál APORTIL, no iha tuku 12:00 kontinua halo buska no aprensaun ba Diretór Nasionál Cabotage ninia rezidénsia iha Comoro, Dili.

Durante prosesu buska, Prezidente APORTIL, Flávio Cardonso Neves, hateten prontu koopera hodi fasilita dokumentu-sira ligadu ba órgaun-sira ne’ebé hala’o serbisu iha instituisaun ne’e.

Nia dehan, kontratu ba prosesu ró ne’e Ministru Transporte no Komunikasaun (MTK) mak aprova direta no APORTIL fasilita de’it.

Kona-bá prosesu pagamentu invoice, Ministru Transporte Komunikasaun mak aprova, maibé to’o agora pagamentu seida’uk la’o.

Iha prosesu ne’e, akompaña mós hosi Polísia Nasionál Serbisu Investigasaun Kriminál (PNSIK), hodi fó  seguransa ba CAC.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here