Ekipa AS Ponta Leste. Imajen/Espesiál

DILI, 16 agostu 2021 (TATOLI) – Klube Primeira Divizaun, AS Ponta Leste iha tinan  ne’e, fó fiar ba treinadór ho lisensa B, Francisco de Araújo sai treinadór prinsipál hodi troka treinadór sesante Eduardo Pereira iha époka ne’e.

AS Ponta Leste rekruta Francisco tanba iha fulan hira ba kotuk treinadór sesante Eduardo Pereira submete ona karta rezignasaun atu foku loos de’it ba selesaun nasionál U-19 no mós kumprimenta ba rekizitu inkompatibilidade  treinadór sira  nian hosi FIFA atu la bele sai treinadór selesaun atu kaer fali klube.

Ba Agência Tatoli iha kampu Federasaun Futeból Timor-Leste (FFTL), Francisco hatete, nia sente hanesan priviléjiu tanba AS Ponta Leste  fó konfiansa ba nia hodi sai hanesan treinadór prinsipál.

“Ha’u sei esforsa oinsá  lori klube ne’e ba hetan vitória,” Francisco de Araújo hateten.

Koñese  Francisco de Araújo

Iha 2015, Francisco de Araújo hanesan treinadór iha klube YMCA maski la konsege lori klube ne’e ba Primeira Divizaun. Enkuantu 2017 kaer fali Zebra konsege salva ekipa ne’e iha Segunda Divizaun.

Iha 2018 lidera fali Atletico Ultramar konsege ultrapasa liga ho terseiru klasifikasaun no kampiaun ba tasa 12 de Novembru iha tempu ne’ebá. Alende ne’e, iha 2020-2021, Francisco hanesan asistente treinadór selesaun nasionál U-19.

“Ho esperiénsia natoon sira ne’e, ha’u sei implementa iha Ponta Leste no lori klube ne’e ba oin,” Francisco de Araújo tenik.

Jornalista   : Hortencio Sanchez

Editór        : Francisco Simões

 

 

HAKEREK NO HATÁN

Please enter your comment!
Please enter your name here