BOBONARO, 16 agostu 2021 (TATOLI)—Fernando de Oliveira Xavier hanesan reprezentante família hosi matebian António Perreira de Jesus, klarifika katak, matebian hakotu-iis tanba kabun moras no la’ós tanba vasina AstraZeneca.

“Ha’u hanesan aman haki’ak hakarak klarifika ba públiku katak, ami-nia oan mate la’ós tanba vasina. Tanba vasina liu ona loron tolu mak nia kabun moras no la konsege salva,” Fernando de Oliveira Xavier  klarifika iha rezidénsia matebian, suku Malilait, postu administrativu Bobonaro, munisípiu Bobonaro, segunda ne’e.

Notísia relevante:COVID-19: óbitu lima, pozitivu 247 no ativu 2.349

Fernando de Oliveira Xavier  hato’o klarifikasaun ne’e tanba haree katak, iha informasaun falsu espalla makás iha média sosiál dehan matebian hakotu-iis tanba simu vasina AstraZeneca.

Nia konta tuir kronolojia katak, matebian simu vasina AstraZeneca doze daruak iha postu vasinasaun sede suku Holsa, postu administrativu Maliana, iha 12 agostu no halo viajen ba ninia rezidénsia, suku Malilait ho kondisaun diak.

Iha domingu 15 agostu nia sente kabun moras no dulas makás, famiíia lori kedan ba halo tratamentu iha sentru saúde Bobonaro, maibé la konsege salva no hakotu-iis iha tuku neen lorokraik.

Família husu ba públika atu evita halo espekulasaun liuliu lori matebian nia naran insulta Governu, tanba família rekoñese ona katak, matebian hakotu-iis tanba moras komplikadu.

Diretór PDHJ delegasaun teritoriál Maliana, Domingos Pinto Tavares, hateten bazeia ba informasaun ne’ebé sira halo entervista no komfirma ho matebian nia kaben, katak matebian iha duni moras komplikasaun.

Tanba ne’e, parte PDHJ sei koordena ho família matebian atu ko’alia ho parte kompañia Telkomcel ne’ebé matebian serbisu ba, hodi buka mekanizmu oinsá kompañia bele konsidera.

Matebian António Perreira de Jesus, moris iha aldeia Malilait, suku Malilait, postu administtativu Bobonaro munisípiu Bobonaro, 06 novembru 1988, husik hela kaben no oan kiak na’in-ida.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here